ᤔᤱᤃᤥᤗᤡᤕᤠᤒᤠ ᤂᤧᤍᤠ᤹

ᤌᤠᤱᤒᤧᤴ ᤏᤢ ᤀᤡᤔᤢᤰᤗᤠ

• ᤛᤣᤛᤣᤜᤠᤱ ᤑᤡᤕᤠᤁ᤻

ᤕᤖᤡᤰ ᤕᤧᤶ ᤋᤃᤡᤒᤠ ᤐᤠᤏ᤻ᤗᤥ. ᤔᤱᤃᤥᤗᤡᤕᤠᤖᤧᤴ ᤃᤪᤠᤶᤕ ᤁᤢᤄᤠᤗᤧᤵ (ᤐᤪᤍᤧᤛ) ᤀᤥ ᤛᤠᤖᤡᤰᤁᤧ ᤕᤠᤱᤁᤧᤛᤠ᤹ᤒᤠ ᤆᤢᤰᤛᤠ ᤜᤡᤶᤛᤕᤅ᤻ᤎᤡᤰ ᤏᤧᤛ᤻ᤛᤠ ॥ ᤜᤧᤴ ᤛᤕᤅ᤻ᤅᤥ ᤁᤠᤵᤔᤥᤔᤠ᤺ ᤏᤢ ᤁᤢᤛ᤻ᤛᤠ ᤏᤧᤵᤑᤢ᤹ᤎᤡᤰ ᤘᤕᤧᤳᤇᤡ ॥ ᤁᤢᤛ᤻ᤛᤠᤀᤡᤸᤗᤧ ᤏᤡᤋ᤻ᤋᤠᤱᤒᤠ ᤋᤠᤶᤓᤢᤱᤔᤥ ᤐᤣᤁ᤻ᤔᤠᤖᤧ ᤛᤡᤱ ᤏᤢ ᤛᤔ᤻ᤑᤧᤳᤗᤠ ᤁᤥᤐ᤻ᤔᤠ-ᤋᤠᤐ᤻ᤔᤠ ᤏᤢ ᤔᤧᤸᤗᤢᤰ ᤁᤶᤔᤠ ᤕᤠᤔ᤻ᤒᤰ ᤆᤥᤃᤢᤖ ᤘᤕᤧ ॥

ᤌᤡᤰᤕᤧᤴ ᤛᤎᤣ ᤜᤧᤰᤁᤣ ᤋᤠᤶᤓᤢᤱᤅᤥ ᤛᤡᤱᤁᤥᤋ᤻ᤇᤧ ᤗᤠᤛᤧᤸᤗᤧ ᤃ ᤌᤠᤱᤒᤧᤴᤏᤡᤸᤗᤧ ᤗᤳᤌᤡᤰ ᤑ᤺ᤁᤧᤖ᤹ᤒᤠ ᤀᤠᤴᤏᤡᤸᤗᤧ ᤁᤢᤛ᤻ᤛᤠᤏ᤻ ᤂᤥᤛᤢᤖᤧᤳᤇ ॥ ᤜᤧᤴ ᤀᤴᤛᤠᤀᤡᤸᤗᤧ ᤋᤠᤶᤓᤢᤱᤅᤥᤏᤢ ᤗᤶᤔᤠ ᤗᤠᤶᤔᤡᤴ ᤌᤠᤀᤡᤱ ᤔᤧᤄᤥᤛᤢᤴᤏᤠᤱ ᤏᤠ᤺ ᤏᤢ ᤁ᤹ᤏᤠ . ᤁ᤹ᤏᤠ ᤏᤢ ᤏᤠ᤺ ᤗ᤹ᤖ ᤗᤠᤱᤄᤧᤃᤧᤖ ᤕᤠᤃᤧ ॥ ᤀᤴᤛᤠᤀᤡᤴ ᤐᤠᤜᤧᤰᤁᤣ ᤋᤠᤶᤓᤢᤱᤔᤥ ᤗᤧᤵᤔᤠᤌᤠᤔᤠᤸᤗᤧ ᤃ ᤛᤡᤃᤣᤒᤠᤖᤧᤴ ᤁᤢᤈᤠᤖᤰ ᤐᤥᤅ᤻ᤐᤣᤁ᤻ᤁᤡᤗᤠᤑᤠ᤹ᤀᤠᤱ ᤀᤴᤛᤠᤴ ᤐᤰᤂᤢᤀᤠᤱ ᤌᤠᤱᤒᤧᤴᤏᤡᤸᤗᤧ ᤜᤡᤶᤔᤥ ᤋᤠᤖᤢ ॥

ᤜᤡᤶᤔᤥ ᤁᤧᤖᤧᤋᤠᤩᤀᤡᤸᤗᤧ ᤁᤢᤶᤔᤠᤖᤧ – ᤺ᤌᤠᤱᤒᤧᤴᤏᤧ ᥄ ᤁᤴ ᤀᤴᤛᤠᤴ ᤀᤠᤳᤋᤡᤀᤥ ᤂᤧᤏᤧ᤹ ᤁᤧᤄᤥᤛᤢᤒᤣ ᥅᤺ ᤗ᤹ᤖᤡᤰ ᤛᤣᤏ᤻ᤍᤥᤛᤢ ॥ ᤁᤢᤛ᤻ᤛᤠ ᤌᤠᤱᤒᤧᤴᤏᤡᤸᤗᤧ ᤀᤠᤴᤍᤧᤴ ᤋᤠᤶᤓᤢᤱᤅᤥ ᤏᤡᤛᤢᤒᤠ ᤐᤠᤏ᤻ᤜᤠ᤹ ᤁᤧᤖᤧᤰ ᤁᤢᤶᤔᤠ ᤆᤧᤰᤋᤢ ॥ ᤁᤢᤶᤔᤠ-ᤁᤢᤛ᤻ᤛᤠ ᤐᤥᤁ᤻ᤄᤧᤳᤇᤡᤀᤠᤱ ᤜᤧᤴ ᤀᤴᤛᤠᤀᤡᤴ ᤏᤥᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤧᤆ᤻ᤇᤢᤖ ᤜᤡᤱᤄᤧᤳᤇᤢ ᤌᤠᤰᤋᤧᤳᤇᤢ ॥ ᤜᤧᤴ ᤀᤴᤛᤠᤀᤡᤴ ᤆᤠᤗᤡᤰᤁᤧ ᤏᤢ᤺ᤒ᤻ᤛᤠ ᤐᤥᤁ᤻ᤂᤧ ॥ ᤌᤠᤱᤒᤧᤴᤏᤡᤴ ᤀᤠᤳᤋᤠᤴ ᤐᤣᤁ᤻ᤗ ᤋᤠᤛᤠᤱ ᤜᤏᤧ᤹ ᤏᤢ ᤛᤥᤖᤡᤰ ᤀᤴᤛᤠᤀᤡᤴᤏᤠᤱ ᤁᤢᤶᤓᤢ᤹ ᤁᤢᤴᤛᤠ᤹ ᤜᤧᤰᤁᤣ ᤐᤣ-ᤋᤠᤩᤖᤀᤣ ᤘᤕᤧ ॥ ᤀᤴᤛᤠᤴ ᤕᤢᤰᤔᤠ ᤕᤧᤶ ᤐᤥᤁ᤻ᤂᤧᤀᤠᤱ ᤃ ᤌᤠᤱᤒᤧᤴᤏᤡᤸᤗᤧ ᤕᤢᤰᤔᤠ ᤜᤣᤁ᤻ᤋᤢ ॥ ᤀᤴᤏᤡᤴ ᤛᤢᤖᤡᤋ᤻-ᤁᤧᤈᤱ ᤜᤧᤰᤁᤣ ᤗᤥᤁ᤻ᤔᤠ ᤜᤣᤁ᤻ᤋᤢ ॥ ᤀᤰᤂᤣ ᤐᤥᤁ᤻ᤂᤧᤖ ᤌᤠᤅᤧᤸᤗᤧ ᤌᤠᤱᤒᤧᤴ ᤏᤢ ᤀᤴᤗᤢᤶᤔᤥ ᤔᤡᤔ᤻ᤈᤒᤠ ᤏᤡᤱᤘᤠ᤹ ᤐᤥᤖᤧᤀᤠᤱ ᤏᤛ᤻ᤛᤧᤀᤣ ᤁᤢᤈᤠ᤹ᤀᤡᤒᤠ ᤔᤡᤔ᤻ᤈ ᤕᤢᤱᤛᤡᤱ ॥

ᤜᤧᤴ ᤕᤧᤶᤔᤥ ᤌᤠᤱᤒᤧᤴᤏᤡᤸᤗᤧ ᤁᤢᤒᤠᤓᤣ᤹ᤀᤡᤴ ᤆᤡᤏᤡᤕᤠ ᤛᤷᤍᤠᤖ᤻ᤖᤧ ᤁᤢᤜᤢᤰᤁᤥ ᤏᤧᤛ᤻ᤛᤧ ॥ ᤜᤧᤴ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤴ ᤐᤕᤔ᤻-ᤕᤶᤒᤠ ᤈᤱᤜᤡᤶᤔᤥ ᤕᤢᤅᤧ ॥ ᤜᤏᤧ᤹ ᤁᤢᤴᤎᤣ᤹ᤛᤠᤒᤠᤀᤣ ᤘᤕᤧ ॥ ᤆᤠᤋ᤻ᤋᤡᤱ ᤏᤢ ᤐᤱᤘᤠᤔᤠᤀᤥ ᤃ ᤛᤠᤖᤡᤰᤁᤣ ᤐᤣᤁ᤻ᤕᤠᤱ ᤁᤧᤈᤥᤁ᤻ᤐᤠ ᤘᤕᤧ ॥ ᤁᤖ ᤜᤧᤴ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤴ ᤛᤠᤖᤡᤰ ᤀᤠᤱᤍᤡᤱ-ᤍᤡᤱᤒᤠ ᤏᤢ ᤔᤡᤔ᤻ᤈᤡ ᤔᤧᤱᤃᤵᤏᤠᤒᤠ (ᤏᤡᤷᤍᤕᤡ ) ᤀᤠᤱ ᤘᤕᤧ ॥

ᤌᤡᤰᤕᤧᤴ ᤃ ᤜᤧᤴᤂᤧ᤹ᤀᤥᤒᤠ ᤆᤡᤏᤡᤕᤠ ᤗᤠᤶᤗᤥᤛᤠᤒᤠ ᤛᤷᤍᤠᤖ᤻ᤖᤧᤸᤗᤧ ᤀᤴ ᤗᤥᤅ᤻ᤔᤥ ᤌᤡᤰᤛᤡᤃᤣᤁ᤻ᤐᤠ ᤁᤧᤒᤥᤅ᤻ᤒᤠᤏᤡᤴ ᤀᤠᤒᤠᤅᤣ ᤀᤣᤛᤠᤔᤠᤴ ᤏᤢ ᤁᤢᤄᤧᤸᤗᤧᤰ ᤂᤠᤶᤄᤢ (ᤖᤠᤈᤩ) ᤐᤡ᤹ᤔᤠ ᤀᤡᤱᤓᤴ ᤆᤥᤃᤢ ॥ ᤏᤠᤴᤓᤥᤔᤡᤒᤠ ᤀᤴ-ᤗᤥᤅ᤻ᤔᤠ ᤕᤧᤴᤏᤠᤱ ᤋᤥᤁ᤻ ᤔᤧᤈᤥᤃᤢ ॥ ᤀᤡᤱᤓᤴ ᤐᤥᤁ᤻ᤂᤧᤒᤠ ᤀᤡᤛᤡᤰᤐᤠ ᤀᤴ ᤗᤥᤅ᤻ᤔᤠ ᤆᤠᤋ᤻ᤋᤡᤱᤅᤥ ᤗᤰᤗᤥᤛᤧ ᤕᤖᤡᤰ ᤗᤠᤈᤣ᤹᤹ᤒᤠ ᤁᤢᤴᤎᤣᤗᤡᤛᤠᤒᤠ ᤏᤢ ᤔᤡᤱᤛᤥᤍᤠᤱᤒᤠ ᤔᤏᤠᤛᤠᤜᤠ᤹ᤖᤧ ᤐᤛᤢᤁ᤻-ᤐᤛᤢᤰ ᤁᤧᤛᤢᤁ᤻ᤐᤠ ᤀᤴᤜᤠ᤹ ᤔᤧᤍᤠᤖᤢᤛᤡᤀᤠᤱ ᤔᤧᤍᤩᤧ ॥ ᤂᤧᤴ ᤕᤧᤶᤔᤥ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤴᤏᤠᤱ ᤁᤢᤕᤠᤔ᤻ᤒᤰ ᤆᤥᤁ᤻ᤛᤠᤒᤠᤜᤠ᤹ ᤏᤢ ᤁᤶᤒᤪᤠᤱᤛᤠᤒᤠ ᤋᤡᤗᤡᤱᤃᤠᤜᤠ᤹ ᤀᤣᤃᤠᤱ-ᤋᤃᤠᤱ ᤑᤳᤇᤢᤛᤡᤀᤠᤱ ᤀᤴᤗᤥᤅ᤻ᤔᤠ ᤆᤠᤳᤋᤡᤱ ᤋᤧᤴᤏᤥ ᤁᤧᤖᤧᤋᤠᤩ ॥

ᤜᤧᤴ ᤕᤧᤶᤔᤥ ᤕᤠᤱᤁᤧᤛᤠ᤹ᤒᤠ ᤌᤠᤒᤧᤴᤏᤡᤴᤏᤠᤱ ᤑ᤺ᤁᤧᤖ᤹ᤒᤠ ᤀᤴᤏᤡᤴ ᤕᤢᤰᤋᤢᤀᤠᤱ ᤀᤠᤒᤠᤅᤣ ᤆᤥᤛᤠᤵᤐᤡ ᤖᤧᤴ ᤕᤠᤰᤑᤠᤛᤥᤔ᤻ᤔᤥ ᤗᤰᤗᤥᤛᤧ ᤜᤧᤴ ᤋᤧᤴᤏᤥ ᤁᤧᤧᤖᤧᤋᤩᤠ ॥ ᤀᤴᤗᤥᤅ᤻ᤔᤠ ᤆᤠᤋ᤻ᤋᤡᤱ ᤌᤡᤶᤒᤣ ᤀᤥᤔᤧᤵᤔᤠᤖᤧ ᤗᤠᤃᤡ ᤛᤠᤖᤡᤰᤁᤧ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ ॥ ᤀᤥᤔᤛᤠᤒᤠᤜᤠ᤹ ᤀᤴ ᤁᤧᤕᤢᤰᤐᤠ ᤀᤠᤳᤋᤡᤴ ᤌᤠᤱᤒᤧᤴᤏᤡᤴ ᤗᤠᤶᤗᤥ ᤐᤥᤅᤡᤗᤠᤑᤠ᤹ᤀᤠᤱ ᤀᤥᤔᤧᤵᤔᤠ ᤛᤋ᤻ᤇᤡᤱ-ᤇᤡᤱ ᤒᤠ ᤔᤧᤒᤥᤁ᤻ᤂᤧᤀᤠᤱ ᤔᤧᤘᤕᤧ ॥

ᤆᤡᤏᤡᤕᤠ ᤛᤷᤍᤠᤖ᤻ᤖᤧᤸᤗᤧ ᤀᤡᤱᤈᤠᤱ ᤆᤥᤃᤢᤏᤢ ᤔᤧᤏ᤻ᤏᤢ ᤀᤴᤗᤥᤅ᤻ᤔᤠ ᤌᤡᤶᤒᤣᤴ ᤜᤣᤁ᤻ᤛᤡᤱ ᤐᤥᤁ᤻ᤂᤧ ॥ ᤌᤡᤶᤒᤣᤀᤥ ᤗᤰᤗᤥᤛᤠᤒᤠ ᤌᤠᤱᤒᤧᤴᤜᤠ᤹ ᤀᤠᤵᤑᤣᤁ᤻ ᤗᤠᤶᤗᤥᤒᤠ ᤐᤥᤅ᤻ᤔᤠ ᤛᤢᤰᤁᤠᤒᤡᤑᤠ᤹ᤀᤠᤱ ᤛᤢᤰᤛᤢᤰᤐᤠ ᤆᤥᤁ᤻ᤛᤢᤶ ᤔᤧᤈᤥᤃᤢ ॥ ᤁᤖ ᤂᤧᤴ ᤌᤠᤱᤒᤧᤴᤏᤡᤸᤗᤧ ᤕᤢᤰᤋᤢᤒᤠ ᤁᤢᤓᤖᤠ ᤀᤴᤏᤡᤴ ᤛᤢᤖᤡᤋ᤻-ᤁᤧᤈᤱᤏᤢᤗ᤻ᤗᤠᤱ ᤆᤠᤗ᤻ᤗᤡᤰᤁᤣ ᤗᤥᤁ᤻ᤋᤧᤖ ᤘᤣ᤹ ᤀᤴᤗᤥᤅ᤻ᤛᤠᤒᤠᤜᤠ᤹ ᤕᤖᤡᤰ ᤀᤣᤃᤠᤱ ᤆᤥᤃᤢᤌᤛᤡᤖ ᤌᤡᤰᤛᤡᤃᤣᤁ᤻ᤐᤠ ᤐᤥᤅ᤻ᤔᤠ ᤔᤡᤰᤐᤣᤀᤥ ᤀᤠᤒᤠᤅᤣ ᤌᤠᤱᤒᤧᤴᤏᤡᤴ ᤁᤧᤳᤋᤢ ॥ ᤁᤧᤖᤧᤰ ᤀᤥᤔᤛᤠᤒᤠᤜᤠ᤹ᤖᤧ ᤀᤡᤋ᤻ᤇᤡᤱᤅᤡᤴ ᤕᤠᤱᤁᤧᤛᤠ᤹ᤒᤠ ᤌᤠᤱᤒᤧᤴᤏᤡᤸᤗᤧ ᤕᤢᤰᤋᤢᤒᤠ ᤀᤴᤏᤥ ᤁᤧᤖᤧ ॥ ᤜᤧᤴ ᤕᤠᤱᤁᤧᤛᤠᤇᤒᤠ ᤌᤠᤱᤒᤧᤴᤏᤡᤴ ᤜᤠᤳᤗᤧᤀᤠᤱ ᤁᤢᤛᤡᤱ ᤔᤧᤏᤡᤋ᤻ᤋᤢᤒᤠ ᤜᤥᤐ᤻ᤋᤧ ॥ ᤜᤧᤸᤗᤧ ᤆᤥᤃᤢᤸᤗᤧ ᤜᤧᤴᤂᤧ᤹ᤀᤥᤒᤠ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤸᤗᤧᤴ ᤀᤣᤛᤠᤔᤧᤴ ᤜᤠᤳᤗᤧᤴ ᤜᤡᤶᤛᤠᤔᤠ ᤐᤥᤅ᤻ᤒᤠᤀᤡ ᤔᤧᤗ᤹᤹ᤖᤧᤖ ᤜᤧ᤹ᤀᤥ ᤁᤧᤈᤢᤶᤒᤠᤱ ᤁᤧᤕᤢᤱᤒᤠ ᤕᤠᤱᤠ ᤁᤢᤴᤎᤣᤗᤡᤛᤠᤒᤠ ᤏᤢ ᤔᤡᤱᤥᤍᤠᤱᤒᤠ ᤆᤡᤏᤡᤕᤠ ᤜᤠ᤹ ᤏᤢ ᤘᤣ᤹ ᤀᤥᤔᤛᤠᤒᤠᤜᤠ᤹ᤗᤢᤶᤔᤥ ᤏᤶᤓᤠ ᤜᤕᤅ᤻-ᤁᤡᤗᤡᤱ ᤐᤥᤁ᤻ᤂᤧ ॥

ᤁ᤹ᤏᤠ ᤗᤧᤑ᤻ᤛᤠᤱ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤸᤗᤧᤴ ᤀᤡᤱᤈᤠᤱ ᤀᤡᤛᤡᤰ ᤀᤴᤗᤥᤅ᤻ᤔᤠᤀᤥ ᤌᤡᤰᤛᤡᤃᤣᤁ᤻ᤐᤠ ᤁᤧᤒᤥᤅ᤻ᤒᤠ ᤌᤠᤱᤒᤧᤴᤏᤡᤴ ᤜᤏᤧ᤹ᤖᤧᤴ ᤑ᤺ᤁᤧᤖ᤹ᤒᤠ ᤀᤴᤏᤡᤴ ᤏᤢ ᤛᤥᤖᤡᤰ ᤛᤷᤍᤠᤖ᤻ᤖᤧᤸᤗᤧ ᤋᤃᤡᤶᤔᤥ ᤔᤧᤀᤢᤋ᤻ᤋᤢ ॥ ᤜᤧᤰᤁᤠᤩᤱ ᤛᤣᤏ᤻ᤍᤥ ᤛᤣᤏ᤻ᤗᤠᤵ ᤔᤧᤈᤥᤃᤢ ॥ ᤁᤖ ᤋᤢᤰᤂᤣᤒᤠ ᤐᤠᤏ᤻ ᤃ ᤌᤣ ᤐᤥᤁ᤻ᤂᤧᤑᤠ᤹ᤗᤧ ᤃ ᤂᤧᤴ ᤌᤠᤱᤒᤧᤴᤖᤧᤴ ᤕᤠᤶᤒᤣᤒᤠ ᤐᤠᤏ᤻ᤜᤠ᤹ ᤂᤠᤩᤶ ᤋᤠ᤹ᤈᤧᤱ-ᤐᤠᤏ᤻ᤜᤠ᤹ ᤌᤠᤀᤡᤱ ᤂᤥᤛᤢᤀᤠᤱ ᤜᤧᤴ ᤕᤠᤱᤁᤧᤛᤠ᤹ᤒᤠ ᤌᤠᤱᤒᤧᤴᤏᤡᤴ ᤌᤣᤀᤠᤱ ᤀᤴᤗᤥᤅ᤻ᤔᤠ ᤆᤠᤋ᤻ᤋᤡᤱ ᤌᤡᤶᤒᤣᤀᤥ ᤗᤰᤗᤖᤧᤒᤠᤑᤠ᤹ᤀᤠᤱ ᤆᤡᤏᤡᤕᤠ ᤛᤷᤖ᤻ᤖᤧᤴ ᤛᤠᤖᤡᤰ ᤁᤢᤕᤠᤁ᤻ ᤗᤧ᤹ᤖᤧ ॥

ᤕᤠᤱᤁᤧᤛᤠ᤹ᤒᤠ ᤌᤠᤱᤒᤧᤴᤏᤡᤴ ᤀᤠᤰᤂᤧᤠᤀᤠᤱ ᤀᤣᤛᤠᤔᤧᤴ ᤐᤡ᤹ᤔᤠᤛᤢᤰᤋᤧᤵᤐᤣ ᤜᤦ ᥅ ᤐᤥᤅ᤻ᤔᤠ-ᤔᤧᤶᤒᤥᤅ᤻ᤔᤠ ᤐᤥᤁ᤻ᤂᤧᤆᤢᤖᤧ. ᤀᤠᤖ ᤁᤴ ᤛᤢᤶᤛᤡ ᤛᤠᤶᤔᤠᤩᤱ ᤆᤢᤰᤌᤠᤎᤡᤰ ᤌᤢᤶᤄᤥ ᤐᤡᤖᤧᤶᤔᤧᤠᤀᤠᤱ ᤐᤠᤱᤄᤧᤶᤋᤧᤛᤧᤶᤔᤧ. ᤐᤠᤋ᤻ᤋᤢᤖ ᤛᤷᤍᤠᤖ᤻ᤖᤧᤸᤗᤧ ᤁᤢᤕᤠᤔ᤻ᤒᤰᤛᤠᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ ॥ ᤜᤧ᤹ᤀᤥ ᤁᤧᤈᤢᤶᤒᤠᤱ ᤁᤧᤘᤠᤒᤠ ᤛᤷᤍᤠᤖ᤻ ᤗᤧᤵᤑᤠᤱᤒᤠ ᤘᤣ᤹ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤕᤠᤱᤁᤧᤛᤠ᤹ᤒᤠ ᤌᤠᤱᤒᤧᤴᤏᤡᤴ ᤇᤠᤩ᤹ᤇᤠᤩ᤹ ᤍᤢᤷ-ᤍᤢᤷ ᤔᤧᤳ-ᤔᤧᤜᤣᤁ᤻ᤋᤢ ॥

ᤛᤷᤍᤠᤖ᤻ᤖᤧᤸᤗᤧ ᤁᤢᤔᤏᤠᤎᤡᤰ ᤌᤠᤱᤒᤧᤴᤏᤡᤸᤗᤧ ᤁᤢᤓᤣᤛᤠᤱ ᤑᤧᤖᤠᤀᤠᤱ – ᤺ᤗ ᤜᤧᤏᤧ᤹ ᤌᤡᤰᤛᤡᤃᤣᤁ᤻ᤐᤠ ᤁᤧᤒᤥᤁ᤻ᤂᤧᤒᤠᤀᤥ ᤁᤴ ᤛᤢᤶᤛᤡ ᤛᤠᤶᤔᤠᤩᤱ ᤆᤢᤰᤌᤠᤖᤰ ᤌᤢᤶᤄᤥ ᤜᤧᤏᤧ᤹ ᤁᤧᤄᤥᤛᤢᤀᤠᤱ ᤘᤠ. ᤛᤷᤍᤠᤖ᤻ᤖᤧᤸᤗᤧ ᤁᤢᤀᤣᤛᤠᤔᤧᤴ ᤂᤥᤔᤠ ᤁᤢᤗᤡᤴ ᤁᤧᤴᤗᤠ᤹ᤖᤧᤴ᤺ ᤔᤧᤳᤋᤢ ॥

᤺᤺᤺ᤀᤠᤒᤠᤅᤣᤒᤠ ᤔᤠᤱᤜᤢᤵᤐᤡᤴ ᤏᤛ᤻ᤛᤣᤒᤠᤏᤧᤃᤖ ᤆᤡᤏᤡᤕᤠ ᤛᤷᤍᤠᤖ᤻ᤖᤧᤸᤗᤧ ᤜᤏᤧ᤹ ᤁᤢᤀᤣᤛᤠᤔᤧᤴ ᤀᤠᤱᤃᤠ᤹ ᤐᤡ᤹ᤀᤠᤖᤀᤣ ᤐᤥᤅ᤻ ॥ ᤁᤴ ᤛᤢᤶᤛᤡ ᤆᤢᤰᤌᤠ ᤛᤠᤶᤔᤠᤩᤱ ᤀᤠᤱᤃᤠ᤹ ᤔᤧᤍᤠᤁ᤻ᤋᤢᤱᤅᤡᤴ ᤐᤠᤋ᤻ᤋᤢᤖ ᤌᤠᤱᤒᤧᤴᤏᤡᤸᤗᤧ ᤌᤢᤶᤔᤡᤛᤠ ᤏᤢ ᤏᤥᤃᤵ ᤐᤡᤖᤢ ॥

ᤀᤠᤰᤁᤥ ᤜᤥ ᥄ ᤁᤴ ᤋᤠᤵᤑᤧᤔ᤻ᤒᤠ (ᤍᤢᤛ᤻ᤋ) -ᤔᤏᤠᤴ ᤃ ᤀᤠᤰᤂᤧᤴ ᤀᤠᤱᤍᤡᤱᤛᤠᤒᤠᤒᤣ ᤜᤦ ᥄ ᤀᤣ ᤀᤰᤂᤣᤍᤱᤒᤠ ᤕᤠᤱᤁᤧᤛᤠ᤹ᤒᤠ ᤔᤏᤠ ᤁᤧᤒᤥᤁ᤻ᤂᤧᤀᤠᤱᤛᤠ ᤛᤷᤍᤠᤖ᤻ᤖᤧᤸᤗᤧᤴ ᤀᤣᤛᤠᤔᤠᤀᤡᤴ ᤁᤧᤛᤥᤁ᤻ᤐᤠ ᥅ ᤗ᤹ᤖ ᤐᤠᤋ᤻ᤋᤢᤖ ᤜᤧ᤹ᤀᤥ ᤁᤧᤘᤠᤒᤠ ᤛᤷᤍᤠᤖ᤻ᤖᤧᤸᤗᤧ ᤁᤢᤕᤠᤔ᤻ᤒᤰᤛᤠᤒᤠᤜᤠ᤹ᤖᤧ ᤌᤠᤱᤒᤧᤴᤏᤡᤴ ᤔᤧᤜᤡᤵᤋᤢᤖ ᤔᤧᤏᤠᤋ᤻ᤋᤢ ᤔᤧᤗᤋ᤻ᤋᤢ ॥ ᤜᤧᤴᤜᤠ᤹ᤖᤧ ᤑ᤺ᤁᤧᤖ᤹ᤒᤠ ᤀᤴᤏᤡᤴᤏᤠᤱ ᤔᤧᤏᤠᤵᤋᤢ ᤔᤧᤗᤠᤖᤢ ॥

ᤆᤢᤱᤈᤖᤡ ᤕᤠᤱᤛᤠ᤹ᤛᤠᤒᤠ ᤌᤠᤱᤒᤧᤴᤏᤡᤴ ᤛᤠᤖᤡᤰᤁᤣ ᤋᤧᤔ᤻ᤒᤢᤰ ᤆᤧᤀᤠᤱ ᤀᤢᤰᤂᤫᤡ-ᤒᤢᤰᤂᤫᤡ ᤐᤥᤁ᤻ᤂᤧᤀᤠᤱ ᤜᤡᤶᤔᤥ ᤁᤧᤖᤧᤋᤩᤧ ॥ ᤜᤏᤧ᤹ ᤋᤢᤔᤢᤒᤠ ᤁᤧᤖᤧᤰ ᤜᤡᤴᤍᤥᤁ᤻ᤂᤠ᤹ ᤁᤢᤶᤔᤠ ᤆᤧᤰᤋᤢ ॥ ᤀᤠᤏᤡ᤹ ᤕᤠᤱᤁᤧᤛᤠ᤹ᤒᤠᤖᤧ ᤀᤰᤂᤣᤒᤠ ᤀᤣ ᤂᤡᤶᤒᤢᤱᤖᤥ ᤐᤠᤋ᤻ᤋᤢᤖ ᤁᤢᤛ᤻ᤛᤠᤴ ᤁᤠᤶᤔᤥᤔᤠ ᤁᤢᤶᤔᤠᤖᤧ ᤜᤠᤱᤜᤠᤱᤘᤠ ᤐᤡᤖᤢ ॥ ᤆᤢᤱᤈᤡᤖᤡ ᤌᤠᤱᤒᤧᤴ ᤁᤢ ᤁᤢᤶᤔᤠᤛᤡᤖᤧ ᤜᤡᤱᤄᤧᤳᤇᤢᤒᤠ ᤀᤴᤏᤡᤴ ᤘᤣ᤹ᤜᤠ᤹ᤖᤧ ᤔᤧᤏᤠᤵᤇᤡ ᤔᤧᤍᤧ᤹ᤖᤢᤒᤠᤀᤥ ᤛᤠᤖᤡᤰᤁᤣ ᤋᤢᤰᤂᤣᤛᤠ ᤐᤥᤁ᤻ᤂᤧᤳᤇᤡ ᤁᤢᤶᤔᤠ ᤁᤢᤛ᤻ᤛᤠ ॥

ᤜᤧᤴ ᤁᤢᤓᤖᤠᤒᤠ ᤀᤴᤏᤡᤴ ᤀᤴᤕᤧᤵᤋᤧᤴᤏᤥ ᤏᤠ᤺ ᤔᤧᤛᤠᤰᤋᤢᤀᤠᤱ ᤔᤧᤕᤧᤵᤛᤢ ॥ ᤆᤡᤏᤡᤕᤠ ᤗᤠᤶᤗᤛᤠᤒᤠ ᤀᤴᤕᤢᤰᤐᤠᤜᤠ᤹ᤖᤧ ᤀᤴᤏᤡᤴ ᤕᤢᤰᤔᤠᤱ ᤀᤠᤒᤠᤅᤣ ᤐᤠᤏ᤻ ᤁᤧᤄᤧᤶᤒᤠ ᤆᤥᤁ᤻ᤔᤠ ᤔᤧᤀᤡᤋ᤻ᤋᤢᤀᤠᤱ ᤘᤕᤧ ॥ ᤁᤖ ᤀᤴᤏᤡᤸᤗᤧ ᤜᤠᤋ᤻ᤇᤡᤀᤠᤱ ᤀᤠᤒᤠᤅᤣ ᤀᤣᤁ᤻ᤌᤠᤰᤔᤠᤴ ᤕᤢᤰᤔᤠ ᤔᤧᤒᤠᤱᤄᤢᤴᤇᤡᤴ ॥ ᤁᤢᤏᤢᤶᤔᤥ ᤛᤷᤍᤠᤖ᤻ᤖᤧᤴ ᤀᤠᤵᤑᤣᤁ᤻ ᤑᤧᤖᤧᤀᤠᤱ ᤀᤴᤏᤡᤴ ᤕᤢᤰᤔᤠ ᤋᤶᤛᤡᤱ ᤆᤥᤃᤢ ॥ ᤁᤖ ᤀᤴᤏᤡᤸᤗᤧ ᤂᤧᤴ ᤛᤷᤍᤠᤖ᤻ᤖᤧᤴ ᤂᤠᤶᤔᤥ ᤌᤠᤵᤛᤢᤌᤀᤠᤱ ᤑᤳ ᤗᤴᤍᤧᤀᤠᤱ ᤜᤡᤶᤗᤧᤵᤑᤠᤱ ᤂᤧᤳᤇᤡᤱ ॥

ᤆᤡᤏᤡᤕᤠ ᤛᤷᤍᤠᤖ᤻ᤖᤧᤴ ᤔᤴᤍᤱᤍᤱᤒᤠ ᤁᤢᤕᤠᤁ᤻ ᤗᤧ᤹ᤖᤧᤀᤠᤱ – ᤂᤧᤴ ᤀᤴᤏᤡᤴ ᤁᤧᤕᤠᤏ᤻ᤍᤢᤶᤃᤖ ᤋᤧᤶᤛᤧᤶᤔᤧᤀᤠᤱ ᤋᤠᤖᤧᤶᤔᤧ. -ᤁᤧᤴᤕᤠᤏ᤻ᤍᤢᤶᤔᤡᤴᤏᤧᤃᤖ ᤛᤧᤖᤧᤶᤔᤧ. ᤔᤧᤳᤇᤡᤖ ᤁᤢᤕᤠᤔ᤻ᤒᤰᤛᤠᤒᤠᤜᤠ᤹ ᤀᤡᤱᤈᤠᤱ ᤐᤡᤡᤖᤢᤛᤡ ॥ ᤀᤴᤕᤢᤰᤐᤠᤜᤠ᤹ᤖᤧ ᤘᤣ᤹ ᤀᤴ ᤔᤧᤕᤢᤰᤋᤢᤀᤠᤱ ᤜᤧᤴ ᤁᤢᤓᤖᤠ ᤀᤴᤏᤡᤴ ᤋᤧᤶᤔᤠᤑᤠ᤹ᤀᤠᤱ ᤁᤢᤀᤣᤃᤠᤱ-ᤁᤢᤀᤣᤃᤠᤱ ᤔᤧᤗᤁ᤻ᤋᤧ ॥ ᤁᤖ ᤛᤢᤖᤡᤋ᤻-ᤁᤣᤈᤱ ᤜᤧᤰᤁᤣ ᤁᤧᤗᤥᤁ᤻ᤐᤠ ᤀᤴᤏᤡᤴ ᤘᤣ᤹ ᤀᤴᤜᤠ᤹ᤖᤧ ᤛᤡ᤹ᤔᤠ ᤐᤠᤏ᤻ᤏᤧ ᤔᤧᤒᤥᤁ᤻ᤂᤧᤴ ॥ ᤁᤢᤏᤢᤶᤔᤥ ᤀᤴᤕᤢᤰᤐᤠᤜᤠ᤹ ᤛᤡᤰᤁᤸᤗᤧ ᤔᤧᤕᤰᤂᤧᤖ ᤂᤧᤴ ᤁᤢᤓᤖᤠ ᤀᤴᤏᤡᤴ ᤗᤡ᤹-ᤋᤥᤅ᤻ᤖᤧ ᤀᤠᤵᤔᤠ ᤔᤧᤜᤣᤁ᤻ᤋᤢ ॥ ᤜᤧᤴ ᤀᤴᤏᤡᤸᤗᤧ ᤁᤢᤎᤰᤁ ᤕᤖᤡᤰ ᤋᤥᤅ᤻ᤅᤡᤸᤗᤧ ᤕᤠᤱᤄᤢ ॥ ᤋᤥᤅᤣ-ᤋᤥᤅ᤻ᤖᤧ ᤁᤧᤍᤡᤶᤒᤠ ᤌᤰᤗᤠ ᤏᤢ ᤛᤡᤔᤠ ᤏᤠ ᤜᤡᤱᤔᤠ ᤐᤥᤁ᤻ᤂᤧᤀᤠᤱ ᤀᤴᤏᤡᤴ ᤀᤠᤵᤑᤣᤁ᤻ᤐᤠ ᤜᤡᤶᤔᤥ ᤁᤧᤖᤧᤋᤩᤧ ॥

ᤜᤡᤶᤔᤥ ᤁᤠᤵᤔᤥᤔᤠ ᤏᤢ ᤌᤠᤱᤒᤧᤴᤛᤠᤀᤡᤴ ᤐᤠᤜᤧᤰᤁᤣ ᤋᤢᤰᤂᤣ-ᤀᤡᤃᤣᤁ᤻ᤛᤠ ᤐᤥᤁ᤻ᤂᤧᤳᤇᤡᤀᤠᤱ ᤕᤢᤅᤧᤳᤇᤡᤒᤠ ᤕᤧᤶᤔᤥ ᤜᤡᤶᤐᤠᤂᤠ ᤀᤴᤏᤡᤸᤗᤧᤴ ᤀᤡᤰᤗᤠ ᤂᤧᤵᤛᤧᤳᤇᤢᤀᤠᤱ ᤐᤠᤂᤠ ᤗᤴᤍᤧᤳᤇᤡ ॥ ᤜᤧᤰᤁᤠᤩᤱ ᤀᤥᤔᤧᤳᤋᤧᤳᤇᤢᤸᤗᤧ ᤃ ᤁᤢᤎᤰ ᤁᤖᤧᤔ᤻ ᤋᤥᤅᤤ-ᤋᤥᤅ᤻ ᤗᤧᤋ᤻ᤇᤡᤱᤒᤠ ᤏᤢ ᤛᤥᤖᤡᤰ ᤔᤰᤂᤡ ᤆᤰᤆᤰ ᤗᤰᤂᤢᤶᤔᤥ ᤕᤧᤒᤧᤖ ᤘᤕᤧᤒᤠ ᤏᤡᤛᤧᤳᤇᤢ ॥ ᤁᤢᤶᤔᤠ-ᤁᤢᤛ᤻ᤛᤠ ᤔᤣᤖᤡᤱᤃᤧᤴ ᤔᤣᤖᤡᤱᤘᤠ ᤐᤥᤁ᤻ᤂᤧᤳᤇᤡᤖ ᤌᤠᤱᤒᤧᤴᤏᤡᤸᤗᤧ ᤀᤴᤏᤡᤸᤗᤧ ᤁᤢᤎᤰᤁ ᤁᤧᤗᤧᤳᤇᤡᤱᤒᤠ ᤋᤥᤅ᤻ᤜᤠ᤹ ᤆᤠᤸᤗᤡᤰᤁᤣ ᤌᤡᤰ-ᤌᤡᤰ ᤗᤋ᤻-ᤜᤣᤁ᤻ᤋᤢ ॥ ᤁᤖ ᤀᤴᤏᤡᤸᤗᤧ ᤌᤰᤁ ᤏᤢ ᤕᤖᤡᤰᤁᤣ ᤔᤰᤂᤡ ᤘᤠᤍᤧᤴᤇᤡᤱᤒᤠᤸᤗᤧ ᤀᤴ-ᤍᤠᤱᤒᤠ ᤌᤠᤱᤒᤧᤴᤏᤡᤸᤗᤧ ᤁᤢᤓᤣᤛᤠᤱᤅᤣ ᤀᤴᤏᤡᤸᤗᤧ ᤛᤰᤔᤠ ᤛᤥᤏ᤻ᤇᤡᤱᤔᤠ ᤗᤧᤖᤢ ॥

ᤜᤡᤴᤈᤠ᤹ᤕᤧᤶᤔᤠᤱᤌᤥᤛᤠ ᤜᤡᤱᤄᤧᤳᤇᤢᤀᤠᤱ ᤘᤕᤧᤒᤠ ᤀᤴᤏᤡᤴ ᤀᤧᤵᤗᤧᤰᤏᤢᤀᤣ ᤋᤥᤅ᤻-ᤗᤡ᤹ᤖᤧ ᤔᤧᤀᤠᤒᤢ ᤔᤧᤛᤧᤖᤢᤒᤠ ᤋᤢᤔᤢᤀᤠᤱ ᤌᤠᤱᤒᤧᤴᤏᤡᤴ ᤛᤠᤖᤡᤰ ᤀᤡᤍᤡᤁ᤻ ᤕᤧᤶ ᤂᤠᤖᤠᤰ ᤜᤠᤒᤣ ॥ ᤜᤠᤐ᤻ᤔᤠᤱᤗᤰ ᤌᤣ ᤆᤥᤁ᤻ᤔᤠᤒᤣ ᥅ ᤗ᤹ᤖ ᤀᤡᤋ᤻ᤇᤡᤱᤅᤠᤱ ᤏᤠ᤹ᤛᤡ ᤌᤳᤋᤢᤖ ᤀᤠᤒᤠᤅᤣ ᤜᤡᤶᤏᤡᤋ᤻ᤋᤠᤱᤒᤠ ᤑᤢᤱᤀᤡᤁ᤻ᤋᤠᤵᤐᤥ ᤗᤳᤌᤡᤰ ᤁᤣᤔ᤻ᤒᤠ ᤀᤡᤳᤐᤢᤱ ᤋᤕᤢᤀᤠᤱ ᤜᤖᤧ᤹ᤖᤧᤴ ᤌᤡᤶᤀᤡᤛᤡᤰ ᤀᤴᤏᤡᤸᤗᤧ ᤆᤧ᤺ᤀᤡᤴ ᤐᤠᤜᤧ᤹ᤀᤥ ᤜᤢᤶᤛᤢ ॥

ᤜᤧ᤹ᤀᤥᤏᤢ ᤔᤣᤖᤡᤱᤃᤧᤴ-ᤔᤣᤖᤡᤱ ᤆᤥᤁ᤻ᤁᤡ ᤌᤠᤱᤒᤧᤴᤏᤡᤴ ᤀᤴᤏᤡᤸᤗᤧᤴ ᤀᤡᤳᤐᤢᤱᤅᤥ ᤕᤧᤶᤛᤡᤱᤅᤠᤱ ᤔᤡᤰᤘᤠ ᤘᤠᤍᤣᤏ᤻ᤍᤢᤖ ᤕᤧᤶ ᤔᤧᤰᤂᤢᤖ ᤌᤠᤅᤧᤸᤗᤧ ᤌᤡᤰᤕᤧᤴ ᤀᤴᤏᤡᤴ ᤛᤧᤵᤔᤠᤱᤔᤥ ᤏᤡᤛᤢ ॥ ᤀᤴᤏᤡᤸᤗᤧ ᤛᤧᤵᤔᤠᤱᤔᤥ ᤔᤧᤳᤋᤢ – ᤀᤠᤍᤠᤱᤒᤣ ᥄ ᤀᤠᤖ ᤜᤧᤰᤁᤣ ᤔᤧᤏ᤻ ॥ ᤀᤠᤍᤠᤱᤒᤠᤖᤥᤀᤠᤱ ᤀᤡᤱᤃᤠ᤹ᤖᤧᤴ ᤛᤠᤖᤡᤰ ᤕᤶᤒᤠ ᤔᤡᤔ᤻ᤈ ᤘᤠ ॥ ᤀᤠᤖ ᤀᤠᤗᤠᤱᤅᤥᤒᤠ ᤀᤠᤕᤧᤵᤐᤠᤴ ᤗᤋ᤻ᤋᤧᤀᤠᤱ ᤜᤧᤴᤗᤧᤴ ᤗᤳᤌᤡᤰ ᤀᤡᤔᤢᤰᤗᤠ (ᤛᤠᤖᤱᤃᤡ) ᤆᤥᤃᤧᤀᤠᤱ ᤔᤢᤰᤂᤧ ॥ ᤜᤧᤰᤁᤣ ᤁᤧᤈᤥᤃᤢᤏᤧᤃᤖ ᤀᤠᤍᤠᤱᤒᤠ ᤏᤢ ᤛᤍᤣ-ᤛᤍᤣ ᤀᤠᤱᤃᤠ᤹ ᤛᤥᤖᤡᤰ ᤘᤠᤔᤠ. ᤕᤢᤱᤔᤠ. ᤂᤥᤛᤢᤱᤒᤠ ᤘᤠ ॥

ᤛᤧᤵᤔᤠᤱᤔᤥ ᤀᤴᤏᤡᤸᤗᤧ ᤐᤠᤏ᤻ᤏᤡᤴᤗᤧᤧ ᤌᤠᤱᤒᤧᤴᤏᤡᤴ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤥ ᤛᤖᤠᤖᤢᤱ ᤋᤩᤧ ॥ ᤜᤧᤰᤁᤠᤩᤱ ᤀᤴᤏᤡᤸᤗᤧ ᤐᤡᤖᤢᤒᤠ ᤀᤡᤱᤍᤱ ᤀᤡᤛᤡᤰ ᤐᤠᤜᤧᤴ ᤕᤧᤶᤔᤥᤀᤣ ᤀᤴᤏᤡᤸᤗᤧᤴ ᤀᤡᤳᤐᤢᤱᤅᤡᤴ ᤋᤕᤢᤀᤠᤱ ᤀᤴᤏᤡᤸᤗᤧᤴ ᤁᤢᤗᤠᤱᤅᤥᤒᤠ ᤁᤢᤕᤧᤵᤐᤠᤴ ᤗᤋ᤻ᤋᤢ ॥ ᤜᤧᤴ ᤕᤧᤵᤐᤠᤴᤗᤧᤴ ᤁᤢᤕᤠᤀᤥ ᤀᤴᤏᤡᤸᤗᤧᤴ ᤁᤢᤎᤣᤁ᤻ᤁᤡᤸᤗᤧᤴ ᤆᤀᤡᤋ᤻ᤛᤠᤵ ᤆᤥᤃᤢᤀᤠᤱ ᤏᤛ᤻ᤛᤧᤛᤠᤱ ᤛᤠᤖᤡᤰᤁᤣ ᤏᤢ᤺ᤒ᤻ᤛᤠ ᤀᤡᤔᤢᤰᤗᤠ ᤆᤥᤃᤢ ॥

ᤀᤴᤏᤡᤸᤗᤧᤴ ᤀᤡᤔᤢᤰᤗᤠ ᤆᤥᤃᤢᤀᤠᤱ ᤔᤢᤱᤔᤠ ᤋᤶᤛᤡᤱ ᤆᤥᤃᤢᤖ ᤘᤕᤧᤸᤗᤧᤛᤠ ᤏᤛ᤻ᤛᤧᤀᤣ ᤛᤠᤖᤡᤰᤁᤣ ᤁᤢᤀᤡᤰᤗᤠ ᤁᤧᤏᤥ᤹ᤒᤠ ᤐᤥᤁ᤻ᤂᤧᤗᤴᤍᤧ ॥ ᤜᤏᤧ᤹ ᤀᤡᤔᤢᤰᤗᤠ ᤔᤢᤰᤂᤢᤸᤗᤧ ᤁᤢᤓᤖᤠ ᤀᤴᤏᤡᤴ ᤛᤠᤩᤒᤣᤒᤠ ᤔᤣᤖᤡᤱᤗᤥᤒᤠ ᤂᤧᤍᤠ᤹ ᤀᤠᤵᤑᤣᤁ᤻ ᤌᤰᤏᤠᤘᤠ ᤆᤥᤃᤢᤀᤠᤱ ᤛᤠᤶᤔᤧᤳᤋᤢᤖ ᤘᤕᤧ ॥ ᤔᤣᤖᤡᤱᤗᤥᤘᤠᤒᤠ ᤂᤧᤍᤠ᤹ᤖᤧᤴ ᤂᤧᤶᤏᤢᤘᤠ ᤛᤠᤶᤗᤥ ᤔᤧᤄᤧᤵᤛᤢᤀᤠᤱ ᤔᤏᤠᤜᤠ᤹ᤖᤧᤴ ᤐᤕᤔ᤻-ᤕᤶᤒᤠ ᤆᤢᤶᤗᤢᤱᤂᤠᤳᤋᤡ ᤐᤠᤴᤎᤱ ᤐᤥᤁ᤻ᤂᤧᤖ ᤘᤕᤧ ॥ ᤀᤡᤔᤢᤰᤗᤠ ᤀᤡᤰᤗᤠ ᤏᤢ ᤛᤠᤶᤗᤥᤴ ᤔᤧᤄᤧᤵᤛᤢᤀᤠᤱ ᤆᤢᤶᤗᤢᤱᤂᤠᤳᤋᤡ ᤔᤏᤠᤜᤠ᤹ᤖᤧᤴ ᤔᤡᤰᤂᤥᤏᤢ ᤔᤡᤰᤘᤠ ᤘᤠᤍᤣᤏ᤻ᤇᤡᤱ ॥

ᤀᤥᤗᤠᤶ – ᤖᤔᤠᤀᤡᤗᤠ ᤒᤡᤛᤫ ᤁᤌᤠ ᤛᤱᤃᤪᤜ. ᤁᤖᤢᤏᤠᤁᤖ ᤒᤤᤍ᤻ᤎ
ᤐᤠᤏ᤻ᤗᤧᤱ – ᤛᤣᤛᤣᤜᤠᤱ ᤑᤡᤕᤠᤁ᤻

लिम्बू भाषाको कथा ।