ᤗᤠᤶᤍᤡᤰ

ᤀᤠᤖᤢᤒᤥᤋᤧ  ᤐᤠᤱᤓᤣ᤹ᤀᤥᤀᤠᤱ  ᤆᤥᤁ᤻ᤔᤠ  ᤃ  ᤁᤥᤋ᤻ᤋᤢᤶᤒᤣᤀᤠᤱ  ᤘᤕᤧ

•  ᤛᤣᤛᤣᤜᤠᤱ ᤑᤡᤕᤠᤁ᤻

ᤀᤠᤖᤢᤒᤥᤋᤧ  ᤐᤠᤱᤓᤣ᤹ᤀᤡᤴ   ᤔᤠᤩᤰ  ᤌᤥᤍᤡᤶᤖᤧ  ᤔᤧᤛᤢᤛ᤻ᤛᤢᤶᤒᤠ   ᤋᤧᤴ  ॥ ᤑᤧᤍᤧᤴᤏᤢ  ᥇᥋  ᤁᤥᤛ᤻  ᤗᤠᤱᤃᤧᤳ  ᤐᤡᤛᤠᤱᤅᤥ  ᤁᤧᤏᤧᤒᤠ  ᤐᤠᤱᤓᤣ᤹  ॥ ᤁᤴ  ᤐᤠᤱᤓᤣ᤹ᤀᤥ  ᤀᤠᤖᤛᤠᤱ  ᤔᤠᤩᤰ  ᤂᤠᤛᤠᤶ  ᤋᤠ-ᤔᤧᤴᤈᤢᤋ᤻ᤋᤧ  ᤁᤧᤘᤠᤒᤠ  ᤐᤠᤱᤓᤣ᤹  ॥ ᤐᤴᤆᤠᤕᤋ᤻  ᤛᤠᤛᤴ  ᤒᤩᤒᤛ᤻ᤌᤠ  ᤘᤕᤧᤸᤗᤧ  ᤒᤶᤐᤪᤛᤠᤍ᤻  ᤑᤡᤕᤠᤁ᤻ᤖᤧ  ᤁᤢᤒᤠᤋ᤻ᤒᤠᤋ᤻  ᤆᤥᤃᤢᤒᤠ  ᤋᤧᤴᤇᤠᤱ  ᤐᤥᤅ᤻ᤔᤠ  ᤜᤠᤶᤒᤪᤣᤁ᤻ᤐᤠ  ᤌᤥᤍᤡᤶᤖᤧ  ᤕᤠᤔ᤻ᤒᤰ  ᤜᤰᤆᤢᤶᤓᤥ  ᤋᤩᤧᤛᤠᤱ  ᤔᤧᤶᤒᤥᤅ᤻ᤅᤧ  ᤘᤠ  ॥  ᤀᤠᤱᤃᤠ᤹ ᤕᤖᤡᤰ  ᤋᤱᤒᤣ ᤀᤣᤃᤠᤱ  ᤁᤴ  ᤐᤠᤱᤓᤣ᤹ᤀᤥ  ᤛᤡᤰᤛᤠᤶᤒᤠ  ᤕᤠᤔ᤻ᤒᤰ  ᤆᤥᤁ᤻ᤛᤧ  ᤕᤢᤰᤋᤡᤱ  ᤐᤥᤁ᤻ᤂᤠᤱᤅᤠᤱ  ᤘᤠᤀᤠ ॥   ᤕᤠᤔ᤻ᤒᤰ  ᤆᤥᤁ᤻ᤜᤣᤁ᤻ᤋᤢᤱᤒᤠᤀᤠᤱ  ᤂᤵᤔᤤ   ᤛᤢᤶ-ᤋᤱᤒᤣ  ᤁᤧᤳᤔᤠ  ᤀᤡᤋ᤻ᤋᤢᤐᤣᤖᤧᤆ᤻ᤇ  ॥  ᤀᤠᤖ  ᤀᤠᤒᤠᤅᤣ  ᤛᤠᤘᤠᤏ᤻ᤇᤡᤱ  ᤋᤧᤴᤏᤥ  ᤌᤣᤎᤡᤰᤁ  ᤆᤥᤁ᤻ᤔᤤ  ᤐᤥᤁ᤻ᤂᤧᤑᤠ᤹ᤀᤠᤱ  ᤐᤠᤱᤓᤣ᤹ᤀᤥ  ॥ ᤁᤧᤘᤠᤒᤠ  ᤋᤣᤅ᤻ᤈᤢᤶᤜᤠ᤹ᤏᤢ  ᤀᤰᤂᤣ  ᤀᤡᤱᤍᤱ  ᤆᤥᤃᤢᤶᤒᤠ ॥  ᤆᤥᤁ᤻ᤔᤠ  ᤃ  ᤌᤣᤎᤡᤰ  ᤆᤥᤁ᤻ᤔᤠ  ᤛᤢᤰᤋᤧᤳᤋᤠᤱᤒᤣ  ᥅  ᤁᤖᤛᤠᤱ  ᤕᤠᤰᤌᤢᤱᤖᤧ  ᤐᤠᤏ᤻ᤍᤠᤱᤖᤧ  ᤁᤵᤔᤡᤀᤥ  ᤗᤳᤇᤠ-ᤏᤧᤳᤇᤡ  ᤕᤠᤔ᤻ᤒᤰ  ᤆᤥᤁ᤻ᤔᤠᤸᤗᤧ  ᤏᤢ᤹ᤒᤡᤜᤦ  ᤔᤧᤳᤋᤢᤱᤛᤡᤱᤅᤠᤱ  ᤀᤡᤱᤍᤱ  ᤆᤥᤁ᤻ᤔᤠᤏᤠ  ॥ ᤀᤠᤱᤃᤠ᤹  ᤀᤢᤴᤇᤥᤏ᤻  ᤕᤠᤰᤑᤠ  ᤏᤢᤛᤡ ᤜᤠᤒᤪᤣᤰ  ᤏᤡᤖᤢᤱᤒᤠ  ᤐᤠᤏ᤻ᤈᤠᤱᤔᤡᤒᤠ  ᤌᤠᤱᤛᤡᤱ  ᤏᤡᤛᤠᤶᤜᤥᤶᤔᤥ  ᤀᤠᤱᤃᤠ᤹  ᤕᤢᤰᤋᤡᤱ  ᤐᤥᤁ᤻ᤂᤠᤱᤅᤠᤱ  ᤁ᤹ᤏᤠ    ᤜᤧᤴ ᤏᤡᤛᤠᤶᤜᤡᤶᤔᤥ  ᤕᤠᤱᤈᤡᤰ   ᤔᤢᤴᤎᤢᤶ  ᤏᤢ  ᤕᤠᤰᤌᤢᤱ  ᤐᤠᤏ᤻ᤍᤠᤱ ᤏᤡᤛᤠᤶ  ᤜᤢ᤹ᤖᤢᤱᤛᤡᤱ  ॥ ᤜᤧᤰᤁᤣᤗ᤹ᤖ  ᤐᤠᤱᤓᤣ᤹ᤀᤥ  ᤏᤢᤁ᤻ᤂᤠᤱᤅᤡᤸᤗᤧ  ᤗᤳᤇᤠ-ᤏᤧᤳᤇᤡ  ᤘᤠᤏ᤻ᤍᤡᤶᤒᤥᤜᤠ᤹  ᤌᤡᤶᤒᤣᤜᤠ᤹   ᤐᤠᤱᤓᤣ᤹ᤀᤥ  ᤋᤠᤖᤢᤱᤅᤠᤱ  ᤋᤩᤠᤱᤅᤠᤱ  ᤘᤕᤠ ॥

ᤜᤧᤴ  ᤕᤧᤶᤔᤥ  ᤁᤡᤖᤠᤋ᤻  ᤕᤠᤰᤌᤢᤱ   ᤆᤢᤶᤗᤢᤱᤅᤡᤸᤗᤧ  ᤀᤡᤈᤠᤰ  ᤆᤥᤃᤢᤒᤠ  ᤕᤠᤱᤓᤢᤱᤔᤠ  ᤌᤡᤶᤒᤣ    ᤜᤣᤁ᤻ᤛᤡᤱ  ᤐᤥᤁ᤻ᤂᤧᤀᤠᤱ  ᤘᤕᤧ  ᤐᤠᤱᤓᤣ᤹ᤀᤥ  ॥ ᤀᤡᤱᤃᤠ᤹  ᤁᤡᤕᤠᤆᤢ  ᤐᤠᤴᤌᤷᤒᤠ  ᤛᤢᤜᤠᤱᤔᤡᤒᤠ  ᤘᤕᤠᤱᤅᤡᤸᤗᤧ  ᤐᤠᤴᤌᤷ  ᤐᤥᤖᤠᤁ᤻ᤗᤧᤴ  ᤋᤱᤜᤡᤒᤠᤀᤥ  ᤏᤧᤳᤇᤡᤋᤧᤴ  ᤀᤡᤈᤠᤰ  ᤆᤥᤁ᤻ᤔᤠ  ᤁᤧᤒᤥᤅ᤻ᤒᤠ ᤖᤥᤑᤠ᤹ᤀᤠᤱ   ᤆᤢᤶᤗᤢᤱ  ᤗᤢᤶᤔᤡᤍᤧᤴᤏᤥ  ᤏᤠᤁ᤻ᤛᤡᤱ  ᤆᤥᤁ᤻ᤔᤠᤏᤠᤀᤠᤱ  ᤘᤕᤧ  ॥ ᤜᤧᤴ  ᤀᤡᤛᤡᤰ  ᤐᤠᤴᤌᤷ ᤐᤥᤖᤠᤁ᤻ᤖᤧ  ᤋᤱᤜᤡᤒᤠᤀᤥ  ᤀᤡᤈᤠᤰ  ᤐᤥᤅ᤻ᤗᤑᤠ᤹ᤀᤠᤱ  ᤆᤢᤶᤗᤢᤱᤖᤧ  ᤐᤠᤴᤌᤷᤖᤧ  ᤗᤰᤁᤥ  ᤏᤧᤳᤇᤡ ᤋᤧᤴᤖᤧ  ᤗᤠᤃᤡ  ᤛᤧᤴᤍᤢ  ॥   ᤀᤠᤸᤗ  ᤀᤠᤳᤋᤡ-ᤀᤠᤳᤋᤡᤀᤥ   ᤕᤠᤱᤓᤢᤱᤔᤠ  ᤌᤡᤶᤒᤣ  ᤀᤡᤈᤠᤰ  ᤆᤥᤁ᤻ᤔᤠᤒᤣᤑᤠ᤹ᤀᤠᤱ  ᤆᤢᤶᤗᤢᤱ  ᤐᤠᤴᤌᤷ  ᤐᤥᤖᤠᤁ᤻ᤁᤥ ᤐᤖᤠᤱᤃᤠ  ᤐᤥᤁ᤻ᤂᤠ  ॥  ᤆᤢᤶᤗᤢᤱ  ᤐᤠᤛᤡᤱᤐᤠᤍᤠᤱᤜᤠ᤹ᤖᤧ  ᤀᤠᤏᤡ᤹ᤃᤧ  ᤐᤠᤱᤓᤣ᤹ᤀᤥ  ᤀᤡᤈᤠᤰ  ᤆᤥᤁ᤻ᤔᤠ  ᤛᤢᤰᤋᤢᤶᤒᤣ  ᤐᤠᤐ᤻ᤔᤠ  ᤔᤧᤴᤇᤢᤰᤋᤢᤴ  ॥ ᤁᤢᤏᤢᤶᤔᤥ   ᤌᤥᤛᤢᤌᤡᤶᤒᤠ  ᤖᤠᤈᤧᤴᤍᤪ  ᤈᤒᤣᤃᤢ  ᤏᤢ ᤀᤠᤴᤇᤡ᤹ᤃᤧ  ᤀᤡᤱᤍᤱ  ᤆᤥᤁ᤻ᤔᤠᤀᤠᤱ  ᤕᤠᤔ᤻ᤒᤰ  ᤜᤣᤁ᤻ᤔᤠ  ᤁᤧᤒᤥᤅ᤻ᤒᤠ  ᤐᤥᤁ᤻ᤂᤧ  ॥  ᤜᤧᤴ  ᤀᤡᤛᤡᤰ    ᤗᤳᤌᤡᤰ  ᤐᤖᤢᤵ  ᤕᤠᤱᤏᤠᤶ  ᤏᤢ  ᤘᤣ᤹  ᤐᤖᤢᤵ  ᤀᤠᤒᤠᤱᤓᤣ᤹  ᤀᤠᤖᤢᤒᤥᤋᤧᤀᤥ  ᤜᤢᤵᤋᤱ  ᤆᤥᤁ᤻ᤔᤠᤀᤠᤱ  ᤕᤠᤔ᤻ᤒᤁ᤻  ᤁᤢᤜᤣᤁ᤻ᤛᤡᤱ ᤆᤥᤁ᤻ᤔᤠ  ᤗᤧᤗ᤹ᤒᤠ  ᤀᤡᤱᤍᤱ  ᤐᤥᤁ᤻ᤂᤧ  ॥  ᤀᤡᤱᤍᤱ  ᤐᤥᤁ᤻ᤂᤧᤒᤠ  ᤀᤡᤛᤡᤰ  ᤔᤧᤴᤇᤢᤔᤠ  ᤕᤠᤱᤓᤢᤱ  ᤐᤖᤢᤵ  ᤜᤢᤵᤋᤱ  ᤆᤥᤁ᤻ᤔᤠ ᤏᤡᤴᤎᤥ  ᤆᤥᤃᤢᤶᤒᤠ  ॥ ᤕᤠᤱᤏᤠᤶ  ᤐᤠᤱᤓᤣ᤹ᤀᤥ  ᤗᤡᤗᤠ  ᤈᤒᤣᤃᤢᤖᤧ  ᤁᤢᤗᤠᤶᤗᤥᤀᤥ  ᤛᤣᤁ᤻ᤔᤢᤖᤡ  ᤔᤧᤴᤇᤢᤔᤠ  ᤕᤠᤱᤓᤢᤱ  ᤐᤖᤢᤵ  ᤔᤡᤱᤒᤥ  ᤜᤢᤵᤋᤱ  ᤐᤥᤁ᤻ᤂᤧᤏᤧᤃᤖ  ᤀᤠᤖᤢᤒᤥᤋᤧ  ᤐᤠᤱᤓᤣ᤹ᤀᤥ   ᤀᤠᤜᤡᤶᤛᤠᤔᤠ  ᤏᤷᤔᤗᤠ  ᤆᤧᤶᤈᤱᤖᤧ  ᤁᤢᤗᤠᤶᤗᤀᤥ  ᤏᤡᤛᤠᤗᤢᤱ  ᤔᤧᤴᤇᤢᤔᤠ  ᤕᤠᤱᤓᤢᤱ  ᤐᤖᤢᤵ  ᤜᤢᤵᤋᤱ  ᤐᤥᤁ᤻ᤂᤧ  ॥   ᤀᤠᤖᤢᤒᤥᤋᤧ  ᤐᤠᤱᤓᤣ᤹ᤖᤧᤴ  ᤁᤵᤔᤡᤀᤥ   ᤁᤴ  ᤐᤖᤢᤵᤐᤡᤴᤏᤧ  ᤌᤡᤰᤛᤡᤃᤣᤁ᤻ᤐᤠ  ᤕᤠᤱᤓᤢᤱᤒᤠ  ᤐᤖᤢᤵᤗᤥ  ॥  ᤔᤧᤴᤇᤢᤔᤠᤜᤠ᤹  ᤔᤧᤍᤱᤛᤡᤱᤅᤠᤱ ᤜᤢᤵᤋᤱ  ᤔᤧᤈᤥᤃᤢᤒᤠ ᤐᤖᤢᤵᤐᤡᤴᤗᤧᤴ   ᤌᤥᤛᤢᤎᤡᤶᤒᤠᤀᤥ  ᤔᤠᤏᤢᤍᤡᤱ   ᤏᤷᤔᤗᤠ  ᤆᤧᤶᤈᤱ  ᤑᤡᤕᤠᤁ᤻.  ᤛᤢᤜᤠᤱᤔᤡᤒᤠ   ᤔᤠᤏᤢᤍᤡᤱ  ᤔᤏᤢ ᤑᤠᤃᤥ  ᤑᤡᤕᤠᤁ᤻.  ᤕᤠᤱᤍᤧᤶᤒᤠᤀᤥ ᤠᤔᤠᤏᤢᤍᤡᤱ  ᤔᤡᤏᤠᤁᤢᤔᤠᤖᤡ  ᤕᤠᤰᤂᤠ  ᤑᤡᤕᤠᤁ᤻  ᤔᤧᤒᤥᤁ᤻ᤂᤧᤀᤠᤱ  ᤗᤠᤒ᤻ᤌᤡᤰᤖᤧ  ᤕᤠᤱ  ᤏᤡᤒᤥᤅ᤻  ᤑᤢᤱᤔᤠ  ᤔᤧᤜᤣᤁ᤻ᤋᤢ  ॥ ᤀᤰᤂᤣᤗ᤹ᤖ  ᤀᤠᤖᤢᤒᤥᤋᤧ  ᤐᤠᤱᤓᤣ᤹ᤀᤥ   ᤁᤠᤰ  ᤏᤢ  ᤋᤃᤡ  ᤁᤢᤓᤠ᤹ᤀᤠᤱ  ᤕᤠᤱᤓᤢᤱ  ᤐᤖᤢᤵ  ᤜᤢᤵᤋᤱ  ᤐᤥᤁ᤻ᤂᤧᤒᤠ  ᤜᤥᤐ᤻ᤋᤧ  ॥

ᤜᤧᤴ  ᤕᤧᤶᤔᤥ  ᤕᤠᤶᤒᤡᤳᤇᤠ  ᤁᤠᤵᤐᤥᤒᤠᤜᤠ᤹ᤖᤧ  ᤐᤠᤱᤓᤣ᤹ᤒᤠ  ᤔᤧᤴᤇᤢᤔᤠᤜᤠ᤹  ᤀᤠᤖ  ᤁᤧᤖᤧᤰ    ᤁᤴ  ᤛᤣᤛᤣᤜᤠᤱᤗᤧ   ᤑᤧᤳᤗᤠᤏ᤻ᤇᤡᤒᤠ  ᤐᤥᤁ᤻ᤂᤧᤖᤥ  ᤜᤦ  ᤔᤧᤔᤧᤳᤋᤠᤱ  ॥ ᤁᤧᤖᤧᤰ  ᤛᤡᤱᤏᤠᤋ᤻ᤋᤧ-ᤛᤡᤱᤏᤠᤋ᤻ᤛᤠᤒᤠ  ᤆᤥᤃᤢᤋᤣᤛᤢᤛᤡᤒᤠ   ᤐᤥᤁ᤻ᤂᤧ  ᤔᤧᤔᤧᤳᤋᤠᤱ  ॥ ᤁᤖᤛᤠᤱ  ᤜᤢᤴᤇᤡ  ᤐᤠᤏ᤻ᤏᤡᤴ  ᤔᤧᤴᤄᤧᤶᤔᤧ  ᤀᤠᤕᤠᤔ᤻ᤒᤰᤁᤴ  ᤋᤃᤡ  ᤑᤥᤛᤢᤱᤗ  ᤘᤕᤠᤱ  ॥ ᤜᤧᤰᤁᤣᤖᤡᤰᤁᤣ  ᤜᤧᤴ  ᤐᤖᤢᤵᤐᤥ  ᤐᤠᤱᤓᤣ᤹ᤒᤠ  ᤔᤧᤴᤇᤢᤔᤠᤜᤠ᤹  ᤂᤵᤔᤤ  ᤅᤠᤒᤥᤅ᤻  ᤋᤢᤰᤒᤥᤅ᤻  ᤔᤧᤓᤢᤱᤛᤡᤱᤅᤠᤱ  ᤕᤠᤱᤓᤢᤱᤔᤠ  ᤏᤢ  ᤛᤡᤱᤏᤠᤋ᤻   ᤐᤡ᤹ᤛᤡᤱᤔᤠ  ᤔᤧᤜᤣᤁ᤻ᤋᤢ  ॥

ᤜᤧᤴ  ᤀᤡᤛᤡᤰᤁᤣ    ᤘᤣ᤹  ᤕᤠᤔ᤻ᤒᤰᤌᤡᤰᤁᤠᤱ  ᤀᤡᤱᤃᤠ᤹ᤖᤧᤴ  ᤋᤱᤜᤡᤒᤠᤀᤥ  ᤆᤥᤁ᤻ᤔᤠᤏᤠ  ॥ ᤜᤧᤴ  ᤕᤧᤶᤔᤥ  ᤔᤥᤖᤱ ᤒᤡᤖᤠᤋᤏᤃᤖᤒᤠ ᤁᤥᤛᤡ ᤀᤧᤑ᤻. ᤀᤧᤶ. ᤏᤢ ᤀᤡᤋᤜᤖᤡ ᤔᤥᤖᤅ᤻ᤗᤠᤶᤏᤢ ᤕᤠᤰᤌᤢᤱ ᤐᤠᤏ᤻ᤍᤠᤱᤒᤠ ᤌᤡᤶᤒᤣ ᤐᤰᤁᤴᤍᤡ. ᤋᤠ᤹ᤈᤧᤱ. ᤗᤢᤱᤔᤠ᤹ᤋᤢᤰᤔᤠ. ᤛᤣᤁ᤻ᤔᤢᤖᤡ ᤏᤢ ᤏᤠᤶᤎᤡᤱᤃᤥ ᤐᤛᤣ ᤐᤥᤁ᤻ᤂᤧᤖ ᤘᤕᤧ ॥ ᤜᤧᤰᤁᤠᤩᤱ ᤖᤣᤍᤡᤕᤥ ᤏᤧᤐᤠᤗ᤻ ᤎᤴᤁᤢᤋᤠ ᤋᤧᤱᤁᤵᤐᤡ ᤐᤛᤣ ᤀᤡᤱᤛᤣᤒᤢᤱᤗᤠᤶ ᤏᤢᤏᤠᤶᤑᤢᤱ ᤌᤡᤶᤒᤣ ᤕᤧᤳᤏᤠᤶᤖᤧ ᤌᤡᤰᤕᤧᤴ ᤁᤢᤖᤢᤵᤐᤠ ᤕᤧᤴᤏᤡᤸᤗᤧ ᤐᤛᤣ ᤐᤥᤁ᤻ᤂᤧᤖ ᤘᤕᤧ ॥ ᤜᤧᤴ ᤌᤡᤶᤒᤣᤜᤠ᤹ ᤂᤧᤶᤔᤠᤀᤠᤱ ᤌᤡᤶᤒᤣᤀᤥ ᤕᤠᤰᤌᤢᤱ ᤛᤠᤶᤗᤥᤜᤠ᤹ ᤂᤧᤶᤔᤠ ᤐᤣᤗᤡᤃᤧᤴ ᤆᤥᤁ᤻ᤔᤠ ᤁᤧᤗ᤹ᤒᤠ ᤀᤢᤛᤪᤢ ᤐᤥᤅ᤻ᤗᤑᤠ᤹ᤀᤠᤱ ᤌᤡᤶᤒᤣ ᤂᤧᤶᤛᤠᤒᤠ ᤐᤖᤢᤵ ᤜᤢᤵᤋᤱ ᤆᤥᤁ᤻ᤔᤠ ᤏᤡᤱᤘᤠ᤹ ᤆᤥᤃᤢᤶᤒᤠ ॥ ᤜᤧᤴ ᤀᤡᤱᤍᤱ ᤏᤢ ᤏᤡᤱᤘᤠ᤹ ᤀᤡᤛᤡᤰ ᤀᤡᤱᤃᤠ᤹ᤖᤧᤴ ᤀᤠᤈᤶᤗᤢᤱᤍᤠᤱᤒᤠᤀᤥ ᤂᤧᤶᤛᤠᤒᤠ ᤐᤖᤢᤵ ᤜᤢᤵᤋᤱ ᤆᤥᤁ᤻ᤔᤠ ᤏᤡᤏ᤻ᤎᤥ ᤆᤥᤁ᤻ᤔᤠᤏᤠ ॥

ᤐᤧᤏᤣ ᤋᤱᤒᤣ ᥈᥆᥌᥆ ᤌᤧᤛᤧᤰᤐᤠ ᥈᥋ ᤕᤧᤴ ᤕᤠᤶᤔᤠ ᤛᤣᤁ᤻ᤔᤢᤖᤡ ᤋᤧᤶᤔᤢᤰᤁᤡ ᤂᤧᤶᤛᤠᤒᤠ ᤐᤖᤢᤵ ᤔᤡᤱᤒᤠ ᤗᤳᤌᤡᤰ ᤖᤣᤍᤡᤕᤥ ᤌᤡᤶᤒᤣ ᤂᤧᤶᤛᤠᤒᤠ ᤐᤖᤢᤵ ᤜᤢᤵᤋᤱ ᤆᤥᤁ᤻ᤔᤠᤏᤠ ॥ ᤑᤥ᤹ᤌᤥᤛᤢᤎᤡᤶᤒᤠ. ᤛᤢᤜᤠᤱᤔᤡᤒᤠ ᤏᤢ ᤕᤠᤱᤍᤧᤶᤒᤠᤀᤥ ᤌᤧᤵᤌᤧᤵᤐᤠᤱ ᤐᤪᤒᤣᤛ ᤑᤡᤕᤠᤁ᤻. ᤔᤡᤖᤠᤁ᤻ ᤑᤡᤕᤠᤁ᤻. ᤋᤡᤁᤠᤎᤴ ᤑᤡᤕᤠᤁ᤻ ᤏᤢ ᤐᤡᤖᤋᤡ ᤑᤡᤕᤠᤁ᤻ ᤛᤁ᤻ᤛᤡᤱ ᤔᤧᤒᤥᤁ᤻ᤂᤧᤏᤧᤃᤖ ᤐᤠᤛᤡᤱᤐᤠᤍᤠᤱᤅᤥ ᤗᤥᤁᤧᤴᤍᤪ ᤑᤡᤕᤠᤁ᤻. ᤍᤡᤗᤐᤪᤛᤠᤍ ᤑᤡᤕᤠᤁ᤻. ᤗᤡᤗᤠ ᤑᤡᤕᤠᤁ. ᤀᤴᤈᤢ ᤑᤡᤕᤠᤁ᤻ ᤏᤢ ᤛᤢᤖᤧᤛ ᤑᤡᤕᤠᤁ᤻ᤛᤡ ᤛᤁ᤻ᤛᤡᤱ ᤔᤧᤒᤥᤁ᤻ᤂᤧ ॥ ᤜᤧᤴ ᤐᤖᤢᤵᤗᤧᤴ ᤋᤠᤖᤠᤵ ᤌᤣᤑᤠ᤹ᤗᤧ ᤖᤣᤍᤡᤕᤥᤗᤠᤶ ᤐᤛᤣ ᤁᤧᤒᤥᤅ᤻ᤒᤠ ᤖᤣᤍᤡᤕᤥ ᤌᤡᤶᤒᤣᤜᤠ᤹ ᤂᤧᤶᤔᤠ ᤏᤢ ᤂᤧᤶᤐᤠᤱᤔᤠᤛᤡ ᤜᤧᤰᤁᤠᤩᤱ ᤕᤠᤰᤌᤢᤱ ᤛᤠᤶᤗᤥᤜᤠ᤹ ᤐᤣᤗᤡᤃᤧᤴ ᤆᤥᤁ᤻ᤔᤠ ᤜᤠᤱᤔᤠ ᤁᤧᤗ᤹ᤒᤠ ᤕᤢᤰᤂᤢᤶᤒᤠ ॥

ᤀᤰᤂᤣᤗ᤹ᤖᤡᤰ ᤜᤢᤵᤋᤱ ᤆᤥᤃᤢᤶᤒᤠ᤹ᤒᤠ ᤂᤧᤶᤛᤠᤒᤠ ᤐᤖᤢᤵᤐᤡᤸᤗᤧ ᤐᤧᤏᤣ ᤋᤱᤒᤣ ᥈᥆᥌᥆ ᤛᤡᤛᤣᤁ᤻ᤖᤥ ᥋ ᤕᤧᤴᤏᤡᤸᤗᤧ ᤆᤢᤶᤗᤢᤱ ᤕᤢᤰᤂᤢᤀᤠᤱ ᤁᤥᤛᤡ . ᤛᤵᤋᤁᤥᤛᤡ ᤏᤢ ᤖᤣᤍᤡᤕᤥ ᤏᤧᤐᤠᤗ᤻ᤗᤠᤶ ᤐᤛᤣ ᤁᤧᤒᤥᤅ᤻ᤒᤠ ᤕᤠᤰᤌᤢᤱ ᤌᤡᤶᤒᤣᤜᤠ᤹ᤖᤧᤴ ᤏᤡᤖᤧᤱ ᤆᤥᤃᤢ ॥ ᤜᤧᤰᤁᤠᤩᤱ ᥈᥆᥌᥆ ᤛᤡᤛᤣᤁ᤻ᤖᤥ ᥇᥈ ᤕᤧᤴ ᤕᤠᤶᤔᤠ ᤕᤠᤰᤌᤢᤱ ᤐᤠᤏ᤻ᤍᤠᤱ ᤁᤵᤔᤡᤀᤥ ᤐᤠᤏ᤻ᤎᤱᤔᤡᤒᤠ ᤌᤡᤶᤒᤣᤀᤠᤱ ᤋᤱᤃᤠᤶ ᤆᤥᤃᤢ ॥ ᤐᤠᤜᤧᤴ ᤕᤧᤶᤔᤥ ᤀᤠᤖᤢᤒᤥᤋᤧ ᤋᤧᤜᤡᤶ (ᤓᤴᤈᤠᤩᤱᤔᤥ) ᤔᤥ ᤆᤢᤶᤗᤢᤱᤆᤥᤁ᤻ ᤔᤡᤱ ᤘᤠᤏ᤻ᤍᤢᤶᤒᤠᤀᤠᤱ ᤕᤢᤱᤍᤧᤴᤎᤡᤰᤁᤠᤱ ᤕᤠᤖᤡᤵ ᤆᤥᤁ᤻ᤔᤠᤏᤠ ॥ ᤜᤧᤴ ᤆᤥᤁ᤻ᤁᤥ ᤏᤡᤛᤠᤗᤢᤱ ᤔᤧᤴᤇᤢᤔᤠ ᤕᤠᤱᤓᤢᤱ ᤐᤖᤢᤵᤗᤧ ᤀᤥᤈᤠᤶᤔᤥ ᤗᤳᤌᤡᤰ ᤑᤥᤏ᤻ᤍᤠ- ᤛᤰᤐᤣᤘᤠ (ᤓᤡᤳᤋᤧ ᤐᤋᤪᤡᤁᤠ) ᤗᤠᤱᤕᤥᤁ᤻ᤁᤡᤴᤏᤠᤱ ᤂᤡᤶᤔᤠ ᤁᤢᤜᤣᤁ᤻ᤛᤡᤱ ᤆᤥᤁ᤻ᤔᤠᤏᤠ ॥ ᤂᤧᤴᤏᤡᤴ ᤀᤡᤱᤃᤠ᤹ᤀᤣ ᤕᤠᤶᤏᤠᤖᤠ ᤐᤣᤜᤴ ᤆᤥᤃᤢᤱᤅᤠᤱ ᤘᤕᤧ ॥

ᤛᤡᤰᤛᤠᤶᤒᤠ ᤕᤠᤔ᤻ᤒᤰ ᤆᤥᤁ᤻ᤏᤢᤛᤠ ᤱ ᤐᤠᤱᤓᤣ᤹ᤀᤥ ᤗᤳᤇᤠ-ᤏᤧᤳᤇᤡ ᤌᤥᤒᤥᤒᤠ ᤕᤠᤔ᤻ᤒᤰ ᤆᤥᤁ᤻ᤔᤠ ᤏᤡᤱᤘᤠ᤹ ᤀᤡᤛᤡᤰ ᤀᤰᤂᤣᤒᤠ ᤕᤠᤔ᤻ ᤛᤡᤰᤛᤠᤶᤒᤠ  ᤕᤠᤔ᤻ᤒᤰ  ᤆᤥᤁ᤻ᤏᤢᤛᤠ ᤱ  ᤐᤠᤱᤓᤣ᤹ᤀᤥ  ᤗᤳᤇᤠ-ᤏᤧᤳᤇᤡ  ᤌᤥᤒᤥᤒᤠ  ᤕᤠᤔ᤻ᤒᤰ  ᤆᤥᤁ᤻ᤔᤠ  ᤏᤡᤱᤘᤠ᤹  ᤀᤡᤛᤡᤰ  ᤀᤰᤂᤣᤒᤠ  ᤕᤠᤔ᤻ᤒᤰᤂᤠ᤹  ᤆᤥᤃᤢᤱᤗ ᤘᤠᤀᤠ  ॥ ᤁᤖ  ᤆᤠᤩ  ᤆᤥᤁ᤻ᤔᤠᤛᤠᤱ  ᤀᤠᤒᤠᤅᤣ  ᤌᤰᤕᤠᤶᤔᤥ ᤏᤢ ᤐᤣᤁ᤻ᤕᤠᤱ  ᤆᤥᤁ᤻ᤔᤠ  ᤁᤧᤒᤥᤅ᤻ᤒᤠ  ᤘᤠ  ॥   ᤋᤣᤅ᤻ᤈᤢᤶᤜᤠ᤹  ᤑᤠ᤹ᤛᤡᤱ  ᤏᤠᤁ᤻ᤔᤠᤛᤡᤸᤗᤧ  ᤀᤠᤶᤔᤠᤴᤑᤠ᤹ᤏᤧᤴ  ॥ ᤐᤥᤅ᤻ᤃᤖ  ᤌᤡ-ᤗᤠᤰᤛᤡ   ᤌᤢᤱᤔᤠ ᤏᤢ  ᤛᤠ ᤆᤠᤔᤠᤀᤥᤖᤰ  ᤛᤠᤩᤱᤐᤧᤴᤍᤠᤱ  ᤐᤣᤁ᤻ᤕᤠᤱ  ᤔᤧᤈᤥᤃᤢ  ॥ ᤀᤠᤰᤂᤣ  ᤆᤥᤁ᤻ᤔᤠ  ᥅

ᤜᤧᤴ  ᤕᤧᤶᤔᤥ  ᤛᤤᤒ᤻ ᤌᤰᤛᤢᤒᤠ  ᤀᤠᤶᤓᤢ᤹ᤎᤡᤰᤗᤧ  ᤌᤧᤈᤥ  ᤌᤧᤈᤥ  ᤐᤠᤋ᤻ᤋᤢᤒᤠ  ᤐᤠᤏ᤻ᤏᤡᤴ  ᤀᤠᤵᤑᤠ᤹ᤗᤧᤀᤠᤱ ᤏᤡᤱᤘᤠ᤹  ᤔᤧᤓᤣᤏ᤻ᤏᤠᤀᤡᤴ  ॥ ᤜᤏᤧ᤹  ᤐᤠᤋ᤻ᤋᤢᤀᤠᤱ  ᤘᤠ – ᤺ᤌᤣ  ᤔᤧᤕᤠ  ᤜᤡᤏᤡ᤹   ᤕᤠᤱ  ᤅᤠᤛᤡ  ᤐᤡ᤹ᤏᤡᤱᤏᤢᤗᤧ  ᤃ  ᤃᤡᤗᤠᤛ᤻ᤎᤡᤰ  ᤗᤠᤰᤛᤡ  ᤀᤡᤅᤢᤱᤅᤠᤱ  ᤌᤢᤅᤢᤱ…….᤺   ॥ ᤏᤛ᤻ᤛᤣᤒᤠ  ᤐᤠᤏ᤻  ᤀᤠᤶᤓᤢ᤹ᤖᤧ  ᤐᤠᤋ᤻ᤋᤢ  ᤑᤠ᤹ᤀᤠᤱ  ᤀᤠᤏᤡᤱᤘᤠ᤹  ᤋᤩᤧᤀᤠᤱ  ᤘᤠ ॥ ᤅᤠᤛᤡ  ᤕᤠᤱ ᤗᤋ᤻ᤋᤢᤸᤗᤧ  ᤂᤧᤴ  ᤂᤏᤣᤏ᤻ᤍᤢᤒᤠ  ᤑᤠ᤹ᤀᤠᤱ  ᤁᤢᤔᤡᤱ  ᤋᤡᤐ᤻ᤐᤠ.   ᤗᤠᤰᤛᤡ  ᤌᤢᤱᤔᤠᤸᤗᤧ  ᤛᤵᤑᤠ᤹ᤛᤠᤱ  ᤔᤡᤰᤁᤡᤴ  ᤋᤡᤐ᤻ᤐᤠ.  ᤔᤡᤱᤅᤡᤴ  ᤋᤡᤋ᤻ᤏᤢᤗᤧ  ᤃ  ᤐᤖᤢ  ᤛᤵᤑᤠ᤹ᤛᤠᤱ  ᤔᤡᤰᤁᤡᤴ  ᤋᤡᤋ᤻ᤋᤡᤸᤗᤧ  ᤏᤢ᤺ᤒᤠ  ᤔᤧᤏ᤻ᤗᤥ  ᥅  ᤔᤡᤱᤅᤡᤴ  ᤋᤡᤋ᤻ᤋᤡᤸᤗᤧ  ᤔᤖᤠᤖᤧ  ᤀᤠᤶᤏᤡ.  ᤔᤡᤱᤛᤥ-ᤋᤠᤱᤛᤥᤛᤠᤒᤠ  ᤀᤠᤒᤥᤅ᤻.  ᤔᤡᤰᤁᤡᤴ  ᤋᤡᤋ᤻ᤋᤡᤸᤗᤧ  ᤛᤵᤔᤠᤛᤠᤱ  ᤀᤠᤱᤍᤡᤱᤗᤠ  ᤗᤠᤶ ᤀᤠᤏᤡ.  ………. ᤜᤦ………..॥ ᤀᤠᤶᤓᤢ᤹  ᤌᤰᤛᤢᤒᤠᤖᤧ  ᤐᤠᤋ᤻ᤋᤢᤒᤠ  ᤐᤠᤏ᤻ᤏᤡᤴ  ᤏᤢ᤺ᤒᤠᤀᤣ  ᤀᤡᤋ᤻ᤋᤢᤱᤗ  ᤘᤠᤀᤠ  ᤀᤣᤴᤏᤡᤱ  ॥ ᤀᤰᤂᤣᤗ᤹ᤖ  ᤐᤠᤱᤓᤣ᤹  ᤌᤠᤅ᤻ᤓᤣ᤹ᤀᤥᤀᤠᤱ  ᤔᤧᤴᤈᤥ  ᤛᤧᤴᤈᤥ  ᤌᤧᤀᤡ  ᤌᤧᤀᤥ  ᤃ ᤆᤥᤁ᤻ᤔᤠ  ᤏᤡᤱᤘᤠ᤹  ᤃ  ᤘᤕᤧ…….. ᤁᤖ  ᤂᤧᤴᤜᤠ᤹  ᤁᤧᤖᤧᤰ  ᤀᤡᤱᤃᤠ᤹ᤖᤧᤴ  ᤀᤡᤋ᤻ᤇᤡᤱᤅᤥᤖᤰ   ᤘᤕᤧᤗᤠᤖᤧ ॥