ᤔᤧᤴᤇᤢᤰᤐᤠᤴ
- ᤛᤣᤛᤣᤜᤠᤱ ᤑᤡᤕᤠᤁ᤻
ᤔᤡᤐ᤻ᤔᤠ…..ᤀᤠᤶᤒᤠ ᤏᤢ ᤀᤠᤶᤔᤠᤛᤡᤖᤧ
ᤑᤠᤰ. ᤘᤠ᤹. ᤛᤱᤄᤧᤳᤇᤢᤖ
ᤛᤠᤵᤗᤠ ᤏᤡᤋ᤻ᤇᤧ ᤕᤠᤵᤔᤡ ᤐᤠᤱᤄᤧᤳᤇᤡ
ᤐᤡᤳ. ᤔᤧᤏ᤻ᤍᤠᤰ. ᤛᤠᤱᤘᤣᤣᤳ ᤛᤱᤄᤧᤳᤇᤢᤖ
ᤛᤠᤵᤐᤴ ᤏᤢ ᤏᤠᤰᤆᤠ ᤕᤠᤵᤔᤡ ᤀᤡᤅᤣᤐᤡᤖᤧᤳᤇᤡ
ᤀᤶᤒᤠ ᤔᤠᤩᤰ ᤕᤖᤡᤰ ᤛᤠᤵᤗᤠ ᤏᤡᤖᤧᤀᤥᤑᤠ᤹ᤀᤠᤱ
ᤐᤠᤩᤱᤛᤡ ᤀᤡᤁ᤻ᤋᤠᤵ ᤛᤱᤄᤧᤳᤇᤢᤖ
ᤐᤠᤱᤈᤢᤶ-ᤐᤠᤱᤕᤁ᤻ᤂᤥ᤹ ᤕᤠᤵᤔᤡ ᤐᤠᤱᤄᤧᤳᤇᤡ ॥
ᤐᤠ᤺-ᤔᤠ᤺ᤖᤧᤴ ᤏᤡᤱᤘᤠ᤹ ᤜᤧᤰᤁᤣ
ᤕᤖᤡᤰᤁᤣ ᤛᤠᤵᤗᤠ ᤏᤡᤖᤢᤱᤗᤀᤠᤱ ᤐᤣᤃᤠᤱ ॥
ᤛᤠᤵᤗᤠ ᤏᤡᤖᤢᤱ-ᤛᤢᤖᤢᤱᤅᤠᤱ
ᤜᤠᤱᤕᤠᤶᤈᤥ ᤆᤠᤔᤥ᤹ ᤜᤠᤱᤈᤥᤁ᤻ᤌᤡᤶ ᤏᤡᤛᤠᤀᤠᤱ ᤔᤧᤶᤒᤱᤒᤠᤴ
ᤘᤣ᤹ᤜᤠ᤹ᤖᤧᤴ ᤛᤢᤁ᤻ᤘᤠᤀᤠᤱ ᤔᤧᤱᤃᤢᤒᤠᤴ
ᤔᤏᤠ ᤗᤠᤈᤣ᤹ᤀᤥ ᤔᤡᤱᤏᤢ ᤌᤰᤗᤠᤀᤠᤱ ᤛᤱᤄᤧ ᤔᤧᤶᤒᤣᤁ᤻ᤐᤠᤴ
ᤔᤏᤠ ᤗᤠᤈᤣ᤹ᤀᤥ ᤜᤠᤶᤒᤪᤣᤁ᤻ᤘᤠ ᤛᤱᤄᤧᤀᤠᤱ ᤔᤧᤶᤒᤣᤁ᤻ᤐᤠᤴ ॥
ᤀᤡᤱᤃᤠ᤹ᤃ ᤀᤣᤣᤴᤜᤠᤶᤒᤪᤣᤁ᤻
ᤛᤠᤘᤠᤏ᤻ ᤂᤠᤶᤄᤢᤖᤧᤴ ᤔᤡᤔ᤻ᤔᤥ ᤔᤕᤠᤱᤂᤧᤖᤠᤱ
ᤔᤠ᤺ᤗᤠᤈᤣ᤹ᤖᤧ ᤁᤢᤕᤠᤶᤒᤣᤀᤥᤀᤣ ᤔᤕᤠᤱᤂᤧᤖᤠᤱ
ᤐᤠ᤺-ᤔᤠ᤺ ᤌᤒᤠᤜᤠ᤹ᤖᤧᤴ ᤔᤡᤱᤛᤥᤀᤥᤀᤣ ᤔᤕᤠᤱᤂᤧᤖᤠᤱ
ᤐᤠ᤺-ᤌᤒᤠ᤹ᤖᤧᤴ ᤁᤢᤴᤎᤣᤗᤡᤀᤥᤀᤣ ᤜᤡᤱᤛᤡᤅᤠᤱᤗ ᤘᤕᤠᤱ ॥
ᤜᤧᤰᤁᤠᤩᤱᤛᤣ
ᤐᤠᤱᤕᤁ᤻ᤁᤥ᤹ ᤈᤱᤜᤡᤶ ᤔᤧᤒᤥᤁ᤻ᤂᤧᤴ ᤀᤠᤔᤡᤱᤅᤥ
ᤐᤠᤱᤈᤢᤶᤔᤥ᤹ ᤗᤠᤈᤣ᤹ᤛᤡᤱᤒᤢᤱ ᤔᤧᤎᤃᤧᤴ ᤀᤠᤔᤡᤱᤅᤥ᤹
ᤜᤠᤱᤈᤥᤁ᤻ᤌᤡᤶ ᤕᤢᤰᤏᤠᤀᤥᤀᤠᤱ ᤔᤧᤃᤧᤖᤧᤴ ᤀᤠᤜᤢᤰᤁᤡᤴ
ᤔᤠᤱᤈᤥᤁ᤻ᤌᤡᤶ- ᤜᤠᤱᤈᤥᤁ᤻ᤌᤡᤶᤔᤥ᤹ᤀᤠᤱ ᤔᤧᤃᤧᤖᤧᤴ ᤀᤠᤗᤠᤱᤕᤥᤁ᤻ᤁᤡᤴ ॥
ᤀᤡᤱᤃᤠ᤹ᤖᤧᤴ ᤛᤢᤔᤠᤈᤡᤀᤥ
ᤛᤠᤵᤗᤠ ᤁᤧᤏᤡᤐ᤻ᤐᤠ ᤐᤥᤅ᤻ᤔᤠᤀᤠᤱ ᤃ
ᤕᤖᤡᤰ ᤕᤠᤱᤛᤠ-ᤁᤢᤴᤎᤣ ᤌᤰᤔᤠ ᤁᤧᤒᤥᤅ᤻ᤒᤠᤖᤧᤳᤇ
ᤜᤠᤱᤕᤠᤶᤈᤥ ᤆᤠᤔᤠᤀᤠᤱ ᤐᤥᤅ᤻ᤒᤡ ᥅
ᤔᤰᤂᤡ ᤐᤡᤐ᤻ᤔᤠᤱ ᤐᤥᤅ᤻ᤒᤡ ᥅
ᤔᤏᤠ ᤛᤧᤵᤔᤠᤛᤡᤀᤠᤱ ᤐᤥᤅ᤻ᤒᤡ ᥅
ᤔᤏᤠᤖᤧ ᤔᤧᤴᤏᤡᤀᤣ ᤂᤢᤔ᤻ᤔᤠᤱ ᤐᤥᤅ᤻ᤒᤡ ᥅
ᤕᤠᤱᤛᤠ ᤁᤢᤴᤎᤣᤗᤡᤛᤠᤒᤠ ᤐᤥᤅ᤻ᤔᤠᤱ ᤀᤧᤗᤧ᤹ᤀᤧᤗᤧ᤹ ᤘᤠᤔᤠ ᤐᤥᤅ᤻ᤒᤠᤖᤧᤳᤇ ॥
ᤈᤱᤜᤡᤶᤔᤧ-ᤈᤱᤜᤡᤶ ᤆᤥᤁ᤻ᤔᤠᤱ ᤛᤢᤶᤋᤠᤰᤑᤠᤌᤥ᤺
ᤗᤠᤱᤜᤢᤰ ᤘᤠᤏ᤻ᤏᤡ ᤕᤢᤱᤔᤠ ᤐᤥᤅ᤻ᤒᤠᤖᤧᤳᤇ ॥
ᤁᤖ ᤀᤠᤱᤃᤠ᤹ᤃ
ᤖᤧᤱᤛᤥᤒᤠ ᤐᤥᤁ᤻ᤂᤠᤱᤛᤠᤱ
ᤕᤠᤱᤠ-ᤁᤢᤴᤎᤣ ᤔᤧᤴᤎᤰᤐᤧᤴᤏᤠᤱ
ᤌᤧᤳᤗᤱ ᤏᤠᤁ᤻ᤁᤡ ᤘᤕᤠᤱᤅᤡᤸᤗᤧ
ᤛᤡᤱᤏᤠᤋ᤻ᤋᤡᤸᤗᤧ ᤁᤡᤷᤗᤡᤵ-ᤁᤡᤷᤗᤡᤵ ᤁᤡᤳᤋᤠᤱᤒᤠ ᤏᤡᤛᤢᤀᤠᤱ
ᤀᤠᤜᤡᤶᤛᤠᤔᤧᤸᤗᤧ ᤌᤡᤰᤕᤧᤴᤎᤰ ᤀᤁ᤻ᤁᤠ
ᤀᤠᤛᤠ-ᤀᤠᤀᤣᤜᤠ᤹ᤖᤧᤀᤠᤱ ᤐᤱᤎᤠᤁ᤻-ᤐᤱᤎᤠᤁ᤻ ᤔᤧᤓᤧᤁ᤻ᤁᤠ
ᤀᤠᤱᤍᤣᤅ᤻-ᤀᤠᤴᤈᤢᤶᤖᤧᤀᤠᤱ
ᤁᤢᤶᤒᤠᤖᤧ ᤐᤠᤩᤱᤛᤡ ᤛᤱᤄᤪ-ᤛᤱᤄᤪ ᤛᤠᤵᤗᤠ ᤏᤡᤳ-ᤐᤠᤱᤄᤢᤛᤠᤱ
ᤁᤸᤗᤧ ᤌᤣᤀᤠᤱ ᤔᤧᤈᤥᤃᤢᤴ
ᤜᤡᤗᤏ᤻-ᤑᤡᤗᤏ᤻ᤍᤣᤖᤰ ᤐᤥᤁ᤻ᤂᤪᤥ
ᤌᤧᤈᤥ-ᤌᤧᤈᤥ ᤔᤧᤔᤧᤳᤋᤠ ॥
ᤜᤧᤰᤁᤠᤩᤱ ᤀᤠᤏᤡᤱᤛᤠᤱ ᤛᤠᤰᤁᤪᤡᤰ ᤐᤢᤁ᤻ᤁᤠᤱ
ᤔᤏᤠ ᤔᤰᤂᤡ ᤐᤡᤋ᤻ᤋᤢᤱᤗ ᤕᤠᤱᤛᤠ-ᤁᤢᤴᤎᤣ ᤌᤃᤢᤱᤑᤠ᤹ᤅᤠᤱ ᤀᤡᤋ᤻ᤇᤡᤱᤅᤠ
ᤛᤠᤶᤈᤡᤁ᤻-ᤔᤢᤴᤎᤢᤶᤔᤡᤸᤗᤧ ᤏᤠ᤹ᤖᤥ ᤔᤧᤳᤋᤠ
ᤔᤏᤠ ᤕᤠᤔ᤻ᤒᤰ ᤜᤧᤰᤁᤣ ᤔᤧᤏ᤻ᤗᤥ ᤔᤧᤳᤋᤠ
ᤀᤠᤜᤢᤰ ᤁᤧᤔ᤻ᤒᤠ ᤆᤥᤃᤢᤱᤅᤠᤱ ᤔᤧᤏ᤻ᤜᤦ
ᤔᤏᤠ ᤕᤠᤏ᤻ᤎᤠᤜᤠ᤹ᤀᤥ ᤂᤢᤏ᤻ᤏᤠᤒᤡᤀᤠᤱ ᤗ᤹ᤀᤠ
ᤀᤠᤏᤡᤱᤘᤠ᤹ᤔᤠᤱᤅᤡᤸᤗᤧ
ᤛᤠᤘᤠᤕᤢᤰᤐᤢᤱᤃᤣᤔ᤻ᤒᤠᤴ ᤜᤧᤰᤁᤣ
ᤁᤧᤏᤠᤁᤧᤛᤠᤶᤎᤠᤀᤠᤱ ᤗᤠᤶᤃᤥᤈᤱ ᤁᤧᤛᤡᤖᤥ ᤔᤧᤳᤋᤠ
ᤀᤡᤱᤗᤧᤰᤋᤢᤱᤛᤡᤱᤗ ᤕᤠᤱᤠ-ᤁᤢᤴᤎᤣ ᤕᤠᤵᤔᤡᤜᤠ᤹ ᤏᤠᤵᤋᤢᤱᤛᤡᤱᤗ᤹ᤀᤠ
ᤛᤠᤱᤃᤪᤠ-ᤗᤢᤱᤜᤡ ᤁᤧᤍᤥᤁ᤻ᤗᤥ ᤀᤠᤴᤎᤒᤠᤖᤧ ᤔᤧᤳᤋᤠ ॥
ᤀᤠᤰᤂᤣ ᤆᤥᤁ᤻ᤔᤠ ᥅
ᤛᤡᤔᤡᤰᤗᤢᤱᤒᤠ ᤜᤕᤅ᤻ᤃᤧᤴ ᤘᤕᤠᤀᤥ
ᤋᤥ᤹ᤍᤥᤔ᤻ᤒᤠᤖᤧ ᤗᤠᤶᤔᤠᤱ ᤜᤥᤐ᤻ᤐᤠᤖᤧᤳᤇ
ᤋᤥ᤹ᤍᤥᤔ᤻ᤒᤠᤖᤧ ᤂᤠᤶᤔᤠᤱ ᤜᤥᤐ᤻ᤐᤠᤖᤧᤳᤇ
ᤐᤧᤷᤃᤧᤰ-ᤘᤧᤷᤃᤧᤰ ᤐᤥᤅ᤻-ᤐᤣᤁ᤻ᤔᤠᤑᤠ᤹ᤛᤠᤱ
ᤏᤡᤛᤠᤶᤒᤠ-ᤌᤠᤁᤢᤖᤧᤴ ᤏᤡᤛᤠᤶ ᤜᤧᤰᤁᤣ ᤔᤧᤏ᤻ᤗᤥ ᤁᤧᤗ᤹ᤒᤠ ᤘᤠ ॥
ᤋᤥ᤹ᤍᤥᤔ᤻ᤒᤠ ᤐᤥᤁ᤻ᤂᤠᤱᤅᤠᤱᤅᤧ
ᤀᤠᤶᤒᤠ ᤏᤢ ᤀᤠᤶᤔᤠᤛᤡᤖᤧᤴ ᤌᤰᤘᤠᤔᤡᤒᤠ ᤀᤡᤋ᤻ᤇᤡᤱᤜᤠ᤹
ᤁᤢᤛᤢᤶᤎᤥ᤹ ᤔᤧᤱᤃᤧᤵᤐᤠᤴᤀᤡᤗᤠ
ᤋᤥ᤹ᤍᤥᤔ᤻ᤒᤠ ᤐᤥᤁ᤻ᤂᤠᤱᤅᤠᤱᤅᤧ
ᤀᤠᤎᤰᤜᤡᤶᤖᤧᤴ ᤋᤡᤕᤧᤕᤧᤒᤠ ᤐᤕᤔ᤻ᤜᤡᤶ ᤆᤥᤁ᤻ᤔᤠ ᤔᤧᤴᤇᤢᤰᤐᤠᤴᤀᤡᤗᤠ ॥