ᤐᤠᤱᤘᤠᤀᤡᤳᤗᤠ

ᤗᤰ-ᤌᤡᤰ

ᤐᤠᤏ᤻ᤏᤡᤸᤗᤧ ᤁᤢᤒᤠᤏ᤻

• ᤛᤣᤛᤣᤜᤠᤱ ᤑᤡᤕᤠᤁ᤻

ᤀᤡᤗᤥᤒᤠᤜᤠ᤹ᤖᤧᤴ ᤏᤡᤛᤢᤶ :
᥇. ᤜᤠᤱᤛᤡᤡᤱ – ᤋᤱᤒᤣ ᥋᥋ ᤕᤥᤍᤱᤒᤠ ᤁᤠᤵᤐᤥᤒᤠ
᥈. ᤔᤡᤰᤛᤣᤏ᤻ – ᤌᤠᤱᤒᤧᤴ (ᤏᤡᤳᤇᤠᤶᤛᤠ)
᥉. ᤛᤛᤢᤰᤁᤢᤶ – ᤛᤡᤡᤛᤠᤔᤧᤴᤇᤡᤏ᤻ (ᤏᤡᤳᤇᤠᤶᤛᤠ)
᥊. ᤛᤧᤶᤓᤢᤱᤔᤠ – ᤛᤡᤡᤛᤠᤔᤧᤴᤇᤡᤏ᤻ (ᤏᤡᤳᤇᤠᤶᤛᤠ)
᥋. ᤜᤠᤱᤔᤋᤡ – ᤜᤠᤱᤛᤡᤱᤖᤧ ᤁᤢᤜᤡᤶᤛᤠᤔᤠ
᥌. ᤛᤢᤰᤂᤠᤱᤏᤠ – ᤜᤠᤱᤛᤡᤱᤖᤧ ᤁᤢᤶᤒᤠᤱᤗᤡᤔᤠ

ᤏᤡᤕᤠᤖᤠ – ᤁᤢᤜᤣᤁ᤻ᤛᤡᤱ

ᤋᤧᤴ – ᤛᤢᤴᤛᤖᤡ ᤎᤖᤠᤏ᤻ᤒᤠ ᤗᤳᤌᤡᤰ ᤜᤡᤶ ॥ ᤜᤡᤶᤔᤡᤸᤗᤧ ᤇᤋ᤻ᤋᤥ ॥

[ᤛᤢᤴᤛᤖᤡ  ᤎᤖᤠᤏ᤻ ᤐᤠᤱᤕᤁ᤻ᤂᤥ᤹ ᤁᤧᤏᤧᤒᤠ ᤐᤏᤢ᤺ᤏᤢ᤺ᤒᤠ ᤈᤱᤜᤡᤶᤔᤥ᤹ᤒᤠ ᤌᤥ ᤇᤋ᤻ᤋᤥ ᤋᤠᤏᤠᤶ ᤕᤧᤶᤔᤥ᤹ ᤜᤠᤱᤛᤡᤱ ᤌᤠᤖᤠᤶᤔᤥ ᤏᤠᤶᤈᤠ᤹ᤀᤡ ᤛᤰᤐᤣᤘᤠ ᤀᤥᤔᤧᤳᤋᤢᤖ ᤕᤢᤱ ॥
ᤀᤣᤣᤴ ᤛᤧᤴᤇᤪᤧᤱᤒᤠ ᤕᤧᤴ ᤐᤥᤁ᤻ᤂᤧᤀᤡᤸᤗᤧ ᤁᤢᤶᤔᤧᤴᤇᤠᤜᤠ᤹ ᤐᤱᤘᤠᤀᤡ. ᤛᤠᤵᤗᤠ ᤏᤡᤋ᤻ᤋᤡ ᤔᤧᤕᤢᤱ ॥ ᤋᤧᤶᤔᤢᤰᤁᤡᤴ ᤏᤠ᤺-ᤏᤠᤰᤏᤠ᤺ ᤔᤢᤰᤗ ᤕᤢᤱ ॥ ᤋᤧᤶᤔᤢᤰᤁᤡᤀᤥᤏᤢ ᤁᤣ ᤔᤢᤰᤗᤠ ᤔᤢᤰᤗ ᤕᤠᤰᤌᤢᤱ ᤐᤠᤏ᤻ᤍᤠᤱ ᤌᤡᤶᤒᤣ ᤀᤡᤈᤠᤰ ᤐᤥᤅ᤻ᤔᤠ ᤀᤡᤋ᤻ᤋᤢᤒᤠ ᤔᤡᤰᤛᤏ᤻ ᤂᤧᤶᤍᤧᤳ ॥ ᤜᤧᤰᤁᤠᤩᤱ ᤗᤳᤌᤡᤰ ᤛᤠᤶᤗᤥ ᤋᤧᤶᤔᤢᤰᤁᤡᤀᤥ ᤛᤁ᤻ᤜᤣᤁ᤻ ॥ ᤐᤱᤘᤠᤀᤡ ᤁᤧᤘᤠᤒᤠ ᤁᤢᤶᤔᤧᤴᤇᤠᤜᤠ᤹ᤖᤧ ᤜᤧᤴ ᤛᤠᤶᤗᤥᤀᤡᤴ ᤔᤧᤱᤄᤧᤵᤛᤢᤴ ॥ ᤛᤠᤖᤡᤰ ᤛᤠᤖᤡᤰ ᤔᤧᤒᤠᤋ᤻ᤗ-ᤔᤧᤀᤣᤋ᤻ᤗ ᤛᤠᤵᤗᤠ ᤔᤧᤏᤡᤋ᤻ ॥ ᤜᤠᤱᤛᤡᤱ ᤁᤢᤛᤡᤰᤆᤡᤃᤧᤗ᤹ᤀᤠᤱ ᤁᤢᤶᤔᤧᤴᤇᤠᤜᤠ᤹ ᤔᤧᤳᤇᤡ ॥ ]

ᤜᤠᤱᤛᤡᤱ – ᤜᤦ ᥄ ᤀᤠᤶᤔᤧᤴᤇᤠ᤹ᤛ ᥄ ᤔᤠᤩᤰ ᤕᤠ᤹ᤕᤠᤁ᤻ᤁᤠᤱ ᤛᤠᤵᤗᤠ ᤏᤡᤖᤧᤶᤔᤧᤏᤠ ॥ ᤋᤧᤶᤔᤢᤰᤁᤡᤀᤥ ᤕᤠᤰᤌᤢᤱ ᤛᤠᤶᤗᤥ ᤂᤧᤵᤛᤢᤱ ᤗ ॥

(ᤁᤢᤶᤔᤧᤴᤇᤠ ᤏᤡᤳᤇᤠᤶᤛᤠᤜᤠ᤹ ᤌᤧᤒᤠ᤹ᤖᤧᤴ ᤐᤠᤏ᤻ᤏᤡᤴ ᤔᤧᤱᤄᤧᤵᤛᤢᤀᤠᤱ ᤛᤠᤩᤳ ᤔᤧᤗ᤹ ॥ ᤛᤠᤵᤗᤠᤏ᤻ᤗᤰ ᤀᤥᤔᤧᤔᤧᤳᤋᤢᤖ ᤔᤧᤕᤢᤱ ॥ ᤋᤧᤶᤔᤢᤰᤁᤡᤀᤥ ᤕᤠᤰᤌᤢᤱ ᤛᤠᤶᤗᤥ ᤛᤁ᤻ᤗ ᤐᤳ ॥)

ᤛᤢᤰᤁᤢᤶ – (ᤁᤢᤴᤎᤧᤒᤠᤖᤧ ᤁᤢᤓᤣᤛᤠᤱ ᤑᤧᤴᤏᤠᤱ) ᤀᤠᤴᤎᤧᤒᤣ ᥄ ᤛᤧᤰᤂᤠ ᤕᤠᤰᤌᤢᤱ ᤐᤠᤏ᤻ᤍᤠᤱᤅᤥᤀᤠᤱ ᤛᤠᤶᤗᤥ ᤘᤠᤔᤢᤒᤠ ॥ ᤜᤧᤏᤧ᤹ᤀᤠᤱ ᤛᤠᤶᤗᤥᤔᤠ ᤁᤧᤛᤢᤰᤋᤢᤒᤡ ᥅

ᤔᤡᤰᤛᤣᤏ᤻ – (ᤜᤏᤧ᤹ᤀᤠᤱ ᤁᤢᤴᤎᤧᤒᤠ᤹ᤖᤧᤴ ᤁᤢᤓᤣᤛᤠᤱ ᤑᤧᤴᤏᤠᤱ) ᤀᤣ ᥄ ᤛᤧᤰᤂᤠ ᤏᤠ᤺ ᤛᤳᤋᤡᤛᤠᤗᤧ ᤝ ᤐᤠᤱᤓᤣ᤹ᤀᤥᤏᤢ ᤁᤧᤍᤠᤒᤠ ᤏᤡᤳᤇᤠᤶᤛᤠᤜᤠ᤹ᤖᤧ ᤔᤧᤒᤠᤋ᤻ᤋᤢᤒᤠ ॥ ᤛᤧᤰᤂᤠᤛᤠ ᤕᤠᤰᤌᤢᤱ ᤐᤠᤏ᤻ᤍᤠᤱᤅᤠᤱ ᤘᤠᤔᤕᤒᤠ ᥄ ᤔᤧᤔ᤻ᤒᤡ ᤌᤧᤒᤠ᤹ᤀᤣ ᥅

ᤛᤧᤶᤑᤢᤱᤔᤠ – (ᤜᤏᤧ᤹ᤀᤠᤱ ᤁᤢᤴᤎᤧᤒᤠ᤹ᤖᤧ ᤁᤕᤓᤣᤛᤠᤱ ᤑᤧᤴᤏᤠᤱ) ᤏᤛ᤻ᤛᤣᤀᤠ……. ᤔᤡᤐ᤻ᤔᤠ ᤜᤧᤴ ᤐᤠᤱᤓᤣ᤹ᤒᤠ ᤏᤡᤳᤇᤠᤶᤛᤠᤜᤠ᤹ᤖᤧ ᤕᤠᤰᤌᤢᤱ ᤛᤠᤶᤗᤥᤖᤥ ᤔᤧᤗ᤹ᤖᤧᤖ ᤛᤠᤶᤔᤧᤗᤥᤖᤧᤀᤠᤱ ᤘᤕᤧ ॥ ᤀᤠᤱᤃᤠ᤹ ᤃ ᤁᤢᤛᤡᤱᤅᤣ ᤔᤧᤴᤏᤡᤐ᤻ᤐᤠᤴ ॥

ᤛᤢᤰᤁᤢᤶ – (ᤁᤢᤜᤢᤰᤁᤡᤸᤗᤧ ᤁᤢᤴᤎᤧᤒᤠ᤹ᤀᤡᤴ ᤘᤠᤏ᤻ᤍᤢᤖ) ᤀᤠᤴᤎᤧᤒᤠ᤹ᤀᤣ ᥄ ᤌᤣᤀᤠᤱ ᤁᤧᤶᤒᤠᤋ᤻ᤏᤧᤶᤒᤠᤒᤣ ᥅ ᤀᤠᤔᤧᤳᤋᤧᤏᤠ ॥

(ᤜᤢᤴᤇᤡ᤹ ᤌᤧᤒᤠ᤹ ᤜᤠᤱᤛᤡᤱ ᤔᤧᤶᤒᤠᤋ᤻ᤋᤧ ᤛᤰᤐᤣᤘᤠᤴᤗᤰ ᤀᤥᤔᤧᤳᤋᤢᤖ ᤕᤢᤱ ॥ ᤁᤧᤖᤧᤰ ᤔᤧᤴᤇᤠᤛᤠᤜᤠ᤹ ᤏᤡᤋ᤻ᤋᤠᤱ ᤔᤧᤍᤠᤩᤀᤠᤱ ᤔᤧᤒᤠᤖᤧᤖ ᤔᤧᤕᤢᤱᤒᤠ ᤏᤡᤛᤢᤛᤡᤀᤠᤱ ᤔᤧᤳᤇᤡ ॥)

ᤜᤠᤱᤛᤡᤱ – ᤌᤣ ᤐᤠᤐ᤻ᤔᤠᤒᤣ ᥅ ᤀᤠᤶᤔᤧᤴᤇᤠ᤹ᤛᤣ ᥄ ᤌᤣᤀᤠᤱ ᤕᤠᤵᤔᤡ ᤛᤏ᤻ᤁᤧᤗᤠᤵᤋᤡᤒᤠᤒᤣ ᥅ ᤜᤡᤏᤡ᤹ ᤔᤡᤰᤑᤢ᤹ᤗᤠ ᤐᤠᤏ᤻ᤍᤠᤱᤗᤰ ᤁᤧᤒᤠᤐ᤻ᤐᤠᤜᤠ᤹ᤖᤧᤀᤠ ॥

ᤛᤢᤰᤁᤢᤶ – ᤀᤠᤴᤎᤧᤒᤠ᤹ᤀᤣ ᥄ ᤕᤠᤰᤌᤢᤱ ᤐᤠᤏ᤻ᤍᤠᤱᤅᤡᤴᤔᤢ ᤀᤠᤏᤡ᤹ ᤕᤠᤰᤌᤢᤱᤒᤠᤜᤠ᤹ᤖᤧᤴᤔᤢ ॥ ᤕᤠᤰᤌᤢᤱ ᤐᤠᤏ᤻ᤍᤠᤱ ᤛᤠᤶᤗᤥᤔᤠ. ᤐᤠᤐ᤻ᤔᤠ. ᤛᤠᤵᤔᤠ. ᤏᤡᤐ᤻ᤔᤠ ᤀᤠᤱᤃᤠ᤹ᤀᤠᤱ ᤛᤠᤖᤡᤰ ᤀᤠᤛᤡᤖᤠ ᤌᤠᤱ ॥ ᤀᤠᤖᤀᤠᤱᤎᤥ ᤀᤠᤏᤡ᤹ ᤏᤡᤛᤠᤶᤜᤡᤶᤔᤥᤀᤠᤱ ᤕᤠᤰᤌᤢᤱ ᤐᤠᤏ᤻ᤍᤠᤱ ᤏᤡᤐ᤻ᤔᤠ ᤐᤥᤅ᤻ᤔᤢ ॥ ᤛᤡᤰᤛᤠᤶᤒᤠ/ᤔᤠᤛᤡᤖᤧ ᤜᤧᤰᤁᤣ ᤔᤧᤒᤠᤋ᤻ᤋᤢ ॥ ᤜᤠᤱᤛᤡᤱ ᤏᤡᤛᤠᤶᤜᤡᤶᤔᤥᤀᤠᤱ ᤕᤠᤰᤌᤢᤱ ᤛᤰ-ᤛᤰ . ᤛᤠᤵᤛᤰ ᤏᤡᤐ᤻ᤔᤠ ᤁᤧᤒᤥᤅ᤻ᤒᤠ ᤐᤥᤅ᤻ᤒᤠᤔᤢ ॥ ᤔᤡᤐ᤻ᤔᤠ ᤀᤠᤏᤡ᤹ᤃᤧ ᤏᤡᤛᤠᤶᤜᤡᤶᤔᤥ ᤋᤕᤶ-ᤛᤡᤰᤛᤠᤶᤒᤠᤖᤧ ᤜᤧᤰᤁᤣ ᤐᤠᤋ᤻ᤋᤢ ॥ ᤜᤏᤧ᤹ ᤁᤧᤖᤧᤰ ᤏᤡᤳᤇᤠᤶᤛᤠᤜᤠ᤹ᤀᤥ ᤌᤠᤀᤡᤱ ᤋᤥᤏ᤻ᤍᤢ ॥

ᤜᤠᤱᤛᤡᤱ – ᤀᤣ…. ᤜᤧᤏᤡ᤹ᤃ ᤛᤠᤖᤡᤰ ᤏᤢ᤺ᤒᤠ ᤐᤠᤏ᤻ᤏᤧ ᤁᤧᤒᤠᤋ᤻ᤋᤢᤶ ᤔᤧᤔ᤻ᤒᤡ ॥ ᤁᤖ ᤌᤣ ᤆᤥᤁ᤻ᤔᤠ ᤀᤠᤖ ᤜᤧᤏᤡ᤹ ᤕᤠᤰᤌᤢᤱᤒᤠ ᤁᤧᤒᤥᤁ᤻ᤂᤡᤛᤠᤱ ᤐᤠᤏ᤻ ᤐᤠᤐ᤻ᤔᤠ ᤁᤧᤴᤕᤠᤏ᤻ᤍᤡᤴ ॥ ᤏᤠ᤹ᤖᤧᤶᤔᤧ. ᤏᤡᤐ᤻ᤔᤠ-ᤛᤠᤵᤔᤠ ᤐᤥᤅ᤻ᤏᤡ ᤏᤠ᤹ᤏᤡ . ᤛᤠᤫᤠᤳ ᤘᤕᤧᤶᤔᤧ ॥

ᤜᤠᤱᤔᤋᤡ – (ᤜᤠᤱᤛᤡᤱᤖᤧ ᤁᤢᤓᤣᤛᤠᤱ ᤑᤧᤴᤏᤠᤱ) ᤔᤧᤔ᤻ᤒᤣ . ᤜᤧᤏᤡ᤹ ᤌᤧᤒᤠ᤹ᤖᤧ ᤕᤠᤶᤔᤥ ᤜᤶᤔᤠ ᤁᤧᤜᤣᤁ᤻ᤋᤧᤒᤡ ᥅ ᤁᤴ ᤔᤡᤰᤑᤢᤗᤠ ᤕᤧᤶᤔᤥ᤹ ᤌᤣ ᤖᤧ ᤕᤠᤰᤌᤢᤱ ᤐᤠᤏ᤻ᤍᤠᤱ ॥ ᤕᤠᤰᤌᤢᤱ ᤐᤠᤏ᤻ᤍᤠᤱ ᤁᤧᤒᤠᤖᤡᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤕᤠᤔ᤻ᤒᤰ ᤁᤧᤒᤡᤖᤡᤒᤡ ᥅ ᤛᤠᤫ᤹ ᤔᤧᤶᤒᤠᤋ᤻ᤋᤧ ᤔᤡᤰᤑᤢᤗᤠ ᤐᤠᤏ᤻ ᤏᤡᤖᤧᤶᤔᤧ ॥ ᤜᤧᤏᤡ᤹ ᤌᤧᤒᤠ᤹ᤖᤧᤴ ᤐᤠᤏ᤻ ᤔᤧᤄᤧᤵᤛᤡᤶᤔᤡᤴᤏᤥ ॥

ᤛᤢᤰᤂᤠᤱᤏᤠ – (ᤁᤢᤴᤏᤥᤐ᤻ᤔᤠᤖᤧ ᤁᤢᤒᤠᤏ᤻ᤏᤡᤴ ᤕᤥ᤹ᤖᤢᤖ) ᤀᤥᤛ᤻ᤒᤠ ᥄ ᤜᤡᤴᤈᤠᤠᤛᤣ ᥄ ᤌᤧᤒᤠ᤹ᤖᤧ ᤁᤢᤒᤠᤏ᤻ᤏᤡᤴ ᤔᤧᤄᤧᤵᤛᤧᤶᤔᤡᤴᤏᤥ ॥ ᤕᤠᤰᤌᤢᤱ ᤐᤠᤏ᤻ᤍᤠᤱ ᤐᤠᤐ᤻ᤐᤠ. ᤛᤠᤵᤔᤠ. ᤏᤡᤐ᤻ᤔᤠᤱ ᤌᤣᤀᤠᤱ ᤔᤧᤒᤥᤅ᤻ᤏᤧᤴ ॥ ᤏᤠ᤹ᤖᤧᤶᤔᤥ (ᤐᤠᤋ᤻ᤗ-ᤐᤠᤋ᤻ᤗ—ᤗᤠᤶᤎᤠᤛᤡᤱᤅᤡᤗ ᤕᤥᤒᤠ ᤕᤠᤰᤑᤠᤱᤅᤥ ᤌᤠᤛᤡᤱᤐᤣᤁ᤻ ॥)

ᤔᤡᤳᤇᤠᤶᤛᤠ ᤜᤡᤴᤈᤠ᤹ᤜᤠ᤹ – (ᤌᤧᤒᤠ᤹ᤜᤠ᤹ᤖᤧ ᤁᤢᤓᤣᤛᤠᤱ ᤏᤠ᤺-ᤁ᤹ᤏᤠ ᤀᤥᤔᤧᤔᤧᤳᤇᤡᤱᤗ ᤔᤧᤕᤢᤱ ॥ ᤜᤧᤰᤁᤠᤩᤱ ᤌᤡᤰ ᤀᤡᤰᤗᤠᤀᤥ ᤔᤧᤒᤠᤋ᤻ ॥) ᤕᤠᤰᤌᤢᤱ ᤐᤠᤏ᤻ᤍᤠᤱᤅᤥ ᤛᤠᤶᤗᤥᤖᤧᤏᤠ ᤌᤧᤒᤠ᤹ᤀᤣ ॥ ᤔᤶᤔᤠ᤹ᤏᤢ ᤕᤢ᤹ᤕᤢᤖᤧ ᤆᤠᤩ ᤐᤠᤳᤇᤢᤏᤡ ᤏᤠᤛ᤻ᤏᤡ ॥ᤀᤠᤏᤡ᤹ᤃᤧ ᤀᤠᤒᤠᤅᤣ ᤐᤠᤏ᤻ ᤏᤡᤖᤢᤶᤒᤠ ॥

ᤜᤠᤱᤛᤡᤱ – (ᤁᤢᤔᤡᤰᤁᤡᤴ ᤗᤧᤰᤂᤢᤖ ᤁᤢᤔᤣᤋ᤻ᤋᤡᤴᤏᤢ ᤁᤢᤶᤒᤠᤱᤗᤡ ᤀᤥᤔᤧᤳᤇᤡᤖ ᤐᤠᤳ) ᤜᤡᤴᤇᤡ᤹ ᤌᤣ ᤁᤧᤏᤡᤛᤢᤒᤣ ᥄ ᤜᤡᤍᤠᤱᤏᤠᤜᤠ᤹ᤖᤧ ॥ ᤋᤣᤋ᤻ ᤆᤠᤱᤔᤠ. ᤛᤠᤶᤔᤠᤩᤱᤑᤢᤱ ᤘᤠᤐ᤻ᤔᤠ ᤏᤢ ᤛᤠᤵᤐᤥᤁ᤻ᤐᤠᤴ ᤋᤡᤶᤗ ᤆᤠᤔᤠ ᤁᤧᤄᤥᤛᤢᤀᤠᤱ ᤌᤣᤎᤡᤰ ᤁᤧᤏᤡᤛᤢᤒᤣ ᥅ ᤌᤡ ᤂᤥᤖᤠᤩ᤹ᤎᤡᤰ ᤏᤢ ᤛᤡᤈᤅ᤻ᤘᤠ ᤌᤢᤱᤔᤠᤎᤡᤰ ᤁᤧᤄᤥᤛᤡᤀᤠᤱ ᤛᤠᤫᤳ ᤁᤧᤘᤠᤔᤠ ᤜᤡᤴᤇᤡ᤹ ᤌᤣ ᤀᤠᤱ ᤁᤧᤴᤏᤡᤛᤢᤴ ॥ ᤛᤠᤫ᤹ ᤔᤧᤒᤠᤖᤧᤳᤇᤧᤴᤏᤥ ॥

ᤜᤠᤱᤔᤋᤡ – (ᤜᤠᤱᤛᤡᤱ ᤗᤧᤵᤑᤠᤱ ᤜᤡᤛᤡᤱᤅᤠᤱ ᤁᤢᤜᤢᤰ ᤘᤠᤏ᤻ᤍᤢᤖ) ᤁᤩᤧ ᤁᤧᤏᤡᤛᤢ ॥ ᤕᤖᤡᤰ ᤔᤧᤒᤠᤖᤧᤴᤏᤥ… ᤀᤡᤱᤃᤠ᤹ ᤋᤁ᤻ ᤔᤧᤎᤥᤁ᤻ᤋᤢᤱᤅᤡᤸᤗᤧ ᤁᤧᤛᤠᤰᤐᤥᤁ᤻ᤐᤧᤴ ᤜᤱᤎᤠᤁ᤻ ᤐᤥᤅ᤻ ॥ ᤕᤖᤡᤰ ᤜᤡᤍᤠᤱᤏᤠ ᤔᤧᤀᤡᤋ᤻ᤋᤠᤱᤅᤡᤴᤏᤥ ᤜᤡᤍᤠᤱᤅᤣ…..,॥

ᤛᤢᤰᤁᤢᤶ. ᤔᤡᤰᤛᤣᤏ᤻ ᤏᤢ ᤛᤧᤶᤓᤢᤱᤔᤠ – (ᤌᤡᤰ ᤀᤡᤰᤗᤠ ᤔᤧᤀᤢᤁ᤻ᤂᤢᤖ) ᤜᤧᤰᤁᤣ ᤔᤧᤏ᤻ ᤌᤧᤒᤠ᤹ ᤕᤢᤔᤠ᤹ᤛᤣ ᥄ ᤀᤠᤏᤡ᤹ᤃᤧᤀᤠᤱ ᤕᤠᤰᤌᤢᤱ ᤐᤠᤏ᤻ ᤜᤢ᤹ᤛᤡᤱᤔᤠ ᤏᤡᤱᤘᤠ᤹ ᤘᤠ ॥ ᤀᤠᤸᤗᤥ ᤐᤠᤐ᤻ᤔᤠ. ᤏᤡᤐ᤻ᤔᤠ ᤏᤢ ᤛᤠᤵᤔᤠ ᤔᤧᤛᤢᤰᤋᤢᤶᤒᤠᤏᤧᤴᤇᤠᤱ ᤆᤥᤁ᤻ᤛᤢᤶ ᤆᤥᤃᤢᤶᤒᤠ ॥ ᤐᤠᤖᤡᤃᤠᤩᤀᤠ ॥ ᤜᤧᤰᤁᤣᤗᤧ ᤔᤧᤏᤢ᤹ᤏᤧᤶᤒᤡ ᤌᤧᤒᤠ᤹ᤀᤣ ᥄

ᤁᤧᤏᤶᤒᤠ ᤗᤰᤁᤡᤴ ᤗᤰ ᤏᤧᤳᤋᤥ ᤏᤡᤐ᤻ᤔᤠ ᤛᤢᤰᤋᤧᤵᤐᤠ ᤘᤠᤖᤥ ॥