ᤛᤠᤶᤔᤡᤗᤠ
ᤏᤡᤱᤘᤠ᤹ᤖᤧᤴ ᤐᤠᤏ᤻ᤎᤡᤰ
- ᤛᤣᤛᤣᤜᤠᤱ ᤑᤡᤕᤠᤁ᤻
ᤁᤢᤛᤱ ᤋᤱ ᤋᤠᤩᤒᤣ ᤔᤡᤰᤘᤠᤖᤰ ᤌᤠᤩᤒᤣ
ᤌᤣᤎᤣᤖᤰ ᤐᤥᤁ᤻ᤂᤧ ᤏᤡᤱᤘᤠ᤹ᤖᤰ ᤔᤣᤣᤒᤣ ॥
ᤛᤐ᤻ᤔᤠᤜᤠ᤹ ᤛᤠᤰᤛᤡᤱ ᤀᤣᤐ᤻ᤔᤠᤜᤠ᤹ ᤛᤠᤰᤛᤡᤱ
ᤗᤠᤶᤃᤥᤈᤱ ᤛᤠᤰᤛᤡᤱ ᤗᤠᤶᤎᤣᤐ᤻ ᤐᤠᤴ ᤛᤠᤰᤛᤡᤱ ॥
ᤏᤠ᤺ᤁ᤹ᤏᤠ ᤔᤧᤒᤠᤋ᤻ ᤕᤥᤎᤥᤀᤠᤱ ᤔᤧᤒᤠᤋ᤻
ᤛᤡᤔᤠ ᤏᤢ ᤜᤡᤱᤔᤠ ᤁᤢᤛᤧᤴᤜᤥᤐ᤻ ᤔᤧᤗ᤹ ॥
ᤁᤥᤖᤥᤏᤠ ᤋᤢᤱᤗᤧ ᤀᤠᤕᤠᤱᤗᤥ ᤗ᤹ᤖᤡᤰ
ᤔᤠᤰᤆᤡᤖᤡ ᤑᤢᤱᤗᤧ ᤀᤠᤍᤧᤵᤗᤥ ᤗ᤹ᤖᤡᤰ ॥
ᤕᤢᤰᤑᤥᤖᤧ ᤀᤠᤸᤗᤥ ᤗᤠᤶᤛᤠᤰᤁᤧ ᤆᤥᤃᤢ
ᤗᤠᤄᤥᤖᤧ ᤐᤠᤏ᤻ᤏᤥ᤹ ᤌᤣᤛᤠᤰᤏᤧ ᤆᤥᤃᤢ ॥
ᤕᤢᤶᤏᤡᤅ᤻ᤃᤣ ᤁ᤹ᤔᤥ ᤔᤧᤃᤧᤖ ᤐᤣᤖᤥ
ᤛᤠᤩ᤹ᤛᤢᤶᤒᤠᤰ ᤘᤣᤣᤒᤧᤴ ᤔᤧᤃᤧᤖ ᤐᤣᤖᤥ ॥
ᤁᤠᤵᤐᤥ ᤏᤢ ᤁᤠᤵᤔᤥ ᤜᤡᤴᤈᤠ᤹ ᤏᤢ ᤐᤡᤳᤇᤢ
ᤌᤣ ᤆᤠᤔ᤻ᤒᤣ ᤗ᤹ᤖᤡᤰ ᤜᤠᤔ᤻ᤛᤡᤱᤔᤠ ᤜᤣᤁ᤻ᤏᤢ ॥
ᤔᤡᤰᤁᤡᤴᤏᤠᤱ ᤜᤱᤎᤠᤁ᤻ ᤛᤠᤵᤐᤥᤁ᤻ᤐᤧᤴ ᤐᤴᤎᤠᤁ᤻
ᤌᤣ ᤐᤥᤁ᤻ᤂᤠ ᤀᤂ᤻ᤍᤶ ᤜᤡᤶᤗᤢᤶᤔᤠᤱ ᤜᤱᤎᤠᤁ᤻ ॥
ᤆᤠᤔᤠᤀᤠᤱ ᤜᤥᤐ᤻ᤗᤥ ᤌᤢᤱᤔᤠᤀᤠᤱ ᤜᤥᤐ᤻ᤗᤥ
ᤋᤠᤰᤁᤴᤏᤠᤱ ᤜᤥᤐ᤻ᤗᤥ ᤐᤠᤂᤠᤗᤴ ᤜᤥᤐ᤻ᤗᤥ ॥
ᤀᤠᤰᤂᤣᤀᤠᤱ ᤀᤠᤸᤗ ᤔᤧᤱᤔᤠᤒᤣ ᤕᤧᤴᤜᤠ᤹
ᤌᤣ ᤆᤥᤁ᤻ᤏᤢ ᤀᤠᤸᤗ ᤋᤥ᤹ᤔᤠᤒᤣ ᤋᤧᤴᤜᤠ᤹ ॥
ᤗᤳᤇᤠ ᤛᤠ ᤘᤠᤒᤣ ᤀᤔᤪᤡᤁᤠ ᤏᤠ᤺ᤀᤠ
ᤗᤳᤇᤠ ᤛᤠ ᤘᤠᤒᤣ ᤕᤢ ᤁᤣ ᤏᤠ᤺ᤀᤠ ॥
ᤀᤣ ᤛᤠᤔᤠ ᤘᤠᤒᤣ ᤁᤠᤌ᤻ᤔᤠᤴᤍᤢ ᤏᤠ-ᤀᤠ
ᤁᤠᤵᤐᤥᤒᤠᤴ ᤘᤠᤖᤥ ᤔᤧᤛᤡᤕᤠ ᤏᤠ᤺ᤀᤠ ॥
ᤁᤧᤖᤧᤰᤁᤧ ᤜᤢᤏᤡ᤹ ᤕᤠᤰᤑᤠᤱᤅᤥ ᤔᤧᤕᤠᤰ
ᤆᤠᤔ᤻ᤌᤢᤱᤔᤧ ᤔᤠ᤹ᤀᤣ ᤛᤧᤳᤗᤠᤁ᤻ᤏᤢ ᤔᤧᤕᤠᤰ ॥
ᤜᤢᤏᤡ᤹ᤀᤠᤱ ᤀᤠᤶᤒᤡ ᤋᤢᤱᤅᤡᤸᤗᤧ ᤔᤠᤩᤰᤔᤠᤩᤰ
ᤛᤢᤛ᤻ᤛᤡ ᤔᤢ ᤀᤠᤶᤒᤡ ᤛᤰᤔᤠᤀᤡᤱ ᤛᤠᤩᤰᤛᤠᤩᤰ ॥
ᤂᤡᤀᤡᤱᤗᤠᤶ ᤂᤧᤵᤛᤢᤱ ᤜᤢᤏᤡ᤹ᤖᤧᤴ ᤀᤡᤱᤄᤱ
ᤀᤡᤱᤛᤣᤗᤠᤶ ᤂᤧᤵᤛᤢᤱ ᤜᤢᤏᤡ᤹ᤖᤧᤴ ᤐᤠᤱᤄᤱ ॥
ᤑᤧᤖᤧᤶᤔᤧᤑᤠ᤹ᤗᤧ ᤜᤡᤁ᤻ᤗᤠᤎᤠ ᤔᤧᤶᤒᤣ
ᤋᤧᤶᤔᤧᤀᤣᤑᤠ᤹ᤗᤧ ᤂᤠᤶᤗᤠᤎᤠ ᤔᤧᤴᤗᤥᤁ᤻ ॥
ᤀᤠᤖ ᤃ ᤀᤠᤏᤡ᤹ ᤔᤧᤴᤍᤢᤶᤔᤧ ᤀᤠᤛᤡ
ᤌᤡᤰᤋᤧᤴᤏᤥ ᤀᤠᤏᤡ᤹ ᤔᤧᤶᤒᤥᤅ᤻ᤅᤣ ᤀᤠᤛᤡ ॥
ᤁᤧᤖᤧᤰᤗᤧ ᤁ᤹ᤔᤥ ᤔᤧᤒᤠᤋᤪ ᤔᤧᤘᤠ
ᤑᤧᤴᤋᤠ᤹ᤈᤧᤱ ᤁ᤹ᤔᤥ ᤔᤧᤒᤠᤋᤪ ᤔᤧᤘᤠ ॥
ᤌᤣᤎᤣᤖᤰ ᤋᤠᤖᤢ ᤕᤧᤶᤔᤡᤸᤗᤧ ᤀᤠᤶᤒᤡ
ᤔᤣᤖᤡᤱᤗᤰ ᤋᤠᤖᤢ ᤕᤧᤶᤔᤡᤸᤗᤧ ᤀᤠᤶᤒᤡ ॥
ᤛᤡᤔᤠ ᤏᤢ ᤜᤡᤱᤔᤠ ᤏᤡᤏ᤻ᤎᤥᤀᤠᤱ ᤜᤥᤐ᤻ᤐᤠ
ᤆᤠᤔᤠ ᤏᤢ ᤌᤢᤱᤔᤠ ᤕᤢᤏ᤻ᤈᤠᤀᤠᤱ ᤜᤥᤐ᤻ᤐᤠ ॥
ᤁᤢᤶᤒᤠ ᤏᤢ ᤁᤢᤶᤔᤠ ᤋᤢᤶᤔᤠᤀᤠᤱ ᤜᤥᤐ᤻ᤐᤠ
ᤏᤠᤶᤕᤠᤵᤔᤡᤛᤠᤜᤠ᤹ ᤆᤢᤶᤔᤠᤀᤠᤱ ᤜᤥᤐ᤻ᤐᤠ ॥
ᤌᤣ ᤘᤕᤠ ᤀᤰᤂᤣ ᤋᤠᤖᤢᤀᤠᤱ ᤋᤠᤩᤒᤠ
ᤁᤢᤛᤱᤋᤱ ᤐᤥᤅᤡ ᤕᤠᤒᤢᤀᤠᤱ ᤋᤠᤩᤒᤠ ॥
ᤀᤠᤖ ᤃ ᤀᤠᤶᤒᤡ ᤆᤠᤩᤐᤥᤅ᤻ᤛᤠᤱ ᤔᤧᤔ᤻ᤒᤡ
ᤗᤢᤱᤔᤠ᤹ᤀᤥ ᤀᤠᤶᤒᤡ ᤌᤢᤶᤛᤠᤶᤏᤢ ᤔᤧᤔ᤻ᤒᤡ ॥
ᤕᤢᤔᤠ᤹ᤖᤧᤴ ᤛᤠᤅ᤻ᤓᤣ᤹ ᤌᤧᤒᤠ᤹ᤖᤧᤴ ᤛᤠᤅ᤻ᤓᤣ᤹
ᤋᤠᤰᤑᤧᤱᤖᤧᤴ ᤛᤠᤅ᤻ᤓᤣ᤹ ᤀᤠᤵᤗᤢᤱᤖᤧᤴ ᤛᤠᤅ᤻ᤓᤣ᤹ ॥
ᤛᤠᤘᤠᤏ᤻ᤇᤡᤱ ᤂᤠᤶᤔᤥ᤹ ᤆᤥᤁ᤻ᤐᤡ ᤃ ᤗᤠᤶᤔᤥ᤹
ᤛᤡᤗᤠᤶᤛᤠᤰ ᤔᤡᤰᤐᤣ ᤑᤥᤔ᤻ᤔᤠᤐᤥᤅ᤻ ᤗᤠᤶᤔᤥ᤹ ॥
ᤔᤢᤴᤎᤢᤶ ᤏᤢ ᤜᤠᤒᤣᤁ᤻ ᤋᤠ᤹ᤎᤰᤁᤡ-ᤎᤰᤁᤡ
ᤋᤢᤴᤍᤣᤖᤧᤴ ᤗᤠᤶᤛᤠᤰ ᤔᤠᤱᤎᤰᤁᤡ-ᤎᤰᤁᤡ ॥
ᤋᤠᤵᤔᤠᤑᤕᤱ ᤀᤥᤁ᤻ᤂᤣ ᤛᤠᤰᤔᤣᤣᤛᤥ ᤐᤥᤁ᤻ᤂᤧ
ᤜᤠᤔ᤻ᤏᤡᤱᤘᤠ᤹ ᤀᤰᤂᤣ ᤐᤠᤐ᤻ᤔᤣᤣᤛᤥ ᤐᤥᤁ᤻ᤂᤧ ॥